ਅਮਰੀਕੀ ਫ਼ੌਜ ਨੂੰ ਚੀਨੀ ਸਾਮਾਨ ਸਪਲਾਈ ਕਰਨ ਦੇ ਦੋਸ਼ਾਂ ਉਪਰੰਤ ਰੰਗਾ ਰੰਗਨਾਥਨ ਤੇ ਉਸ ਦੀਆਂ ਦੋ ਕੰਪਨੀਆਂ ਵਲੋਂ 10 ਲੱਖ ਡਾਲਰ ਦਾ ਸਮਝੌਤਾ
ਨਿਊਯਾਰਕ, 11 ਅਕਤੂਬਰ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕੀ ਫ਼ੌਜ ਨੂੰ ਚੀਨ ਵਿਚ ਬਣਿਆ ਸਾਮਾਨ ਸਪਲਾਈ ਕਰਨ ਅਤੇ ਸਰਕਾਰ ਨੂੰ ਗਲਤ ਜਾਣਕਾਰੀ ਦੇਣ ਦੇ ਦੋਸ਼ਾਂ ਹੇਠ ਨਿਊਯਾਰਕ ਦੇ ਕਾਰੋਬਾਰੀ ਰੰਗਾ ਰੰਗਨਾਥਨ ਅਤੇ ਉਸ ਦੀਆਂ ਦੋ ਕੰਪਨੀਆਂ ਨੇ ਅਮਰੀਕੀ ਸਰਕਾਰ ਨਾਲ 10 ਲੱਖ ਡਾਲਰ ਦਾ ਸਮਝੌਤਾ ਕੀਤਾ ਹੈ। ਇਹ ਮਾਮਲਾ ਸਰਕਾਰੀ ਠੇਕਿਆਂ ਵਿਚ ਖਰੀਦ ਨਿਯਮਾਂ ਦੀ ਕਥਿਤ ਉਲੰਘਣਾ ਅਤੇ ਗਲਤ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਭੁਗਤਾਨ ਹਾਸਲ ਕਰਨ ਨਾਲ ਸੰਬੰਧਿਤ ਹੈ।
ਨਿਊਯਾਰਕ, 11 ਅਕਤੂਬਰ (ਰਾਜੂ ਸ਼ਹਿਬਾਜ਼ਪੁਰਾ)-ਅਮਰੀਕੀ ਫ਼ੌਜ ਨੂੰ ਚੀਨ ਵਿਚ ਬਣਿਆ ਸਾਮਾਨ ਸਪਲਾਈ ਕਰਨ ਅਤੇ ਸਰਕਾਰ ਨੂੰ ਗਲਤ ਜਾਣਕਾਰੀ ਦੇਣ ਦੇ ਦੋਸ਼ਾਂ ਹੇਠ ਨਿਊਯਾਰਕ ਦੇ ਕਾਰੋਬਾਰੀ ਰੰਗਾ ਰੰਗਨਾਥਨ ਅਤੇ ਉਸ ਦੀਆਂ ਦੋ ਕੰਪਨੀਆਂ ਨੇ ਅਮਰੀਕੀ ਸਰਕਾਰ ਨਾਲ 10 ਲੱਖ ਡਾਲਰ ਦਾ ਸਮਝੌਤਾ ਕੀਤਾ ਹੈ। ਇਹ ਮਾਮਲਾ ਸਰਕਾਰੀ ਠੇਕਿਆਂ ਵਿਚ ਖਰੀਦ ਨਿਯਮਾਂ ਦੀ ਕਥਿਤ ਉਲੰਘਣਾ ਅਤੇ ਗਲਤ ਦਸਤਾਵੇਜ਼ਾਂ ਦੇ ਆਧਾਰ ’ਤੇ ਭੁਗਤਾਨ ਹਾਸਲ ਕਰਨ ਨਾਲ ਸੰਬੰਧਿਤ ਹੈ।ਅਮਰੀਕੀ ਨਿਆਂ ਵਿਭਾਗ ਅਨੁਸਾਰ ਰੰਗਨਾਥਨ ਦੀਆਂ ਕੰਪਨੀਆਂ ਨੀਲਸਨ ਹਾਰਡਵੇਅਰ ਕਾਰਪੋਰੇਸ਼ਨ ਅਤੇ ਜੇ ਐਂਡ ਪੀ ਖਾਮਕੇਨ ਇੰਡਸਟਰੀਜ਼ ਉਤੇ ਦੋਸ਼ ਹੈ ਕਿ ਉਨ੍ਹਾਂ ਨੇ ਚੀਨ ਤੋਂ ਮੰਗਵਾਏ ਪੁਰਜ਼ੇ ਅਤੇ ਤਿਆਰ ਸਾਮਾਨ ਅਮਰੀਕੀ ਫ਼ੌਜ ਨੂੰ ਸਪਲਾਈ ਕੀਤਾ ਪਰ ਭੁਗਤਾਨ ਲਈ ਜਮ੍ਹਾਂ ਕਰਵਾਏ ਦਸਤਾਵੇਜ਼ਾਂ ਵਿਚ ਇਸ ਸਾਮਾਨ ਨੂੰ ਅਮਰੀਕੀ ਸਰਕਾਰੀ ਖਰੀਦ ਨਿਯਮਾਂ ਅਨੁਸਾਰ ਦੱਸਿਆ ਗਿਆ।ਰੰਗਨਾਥਨ ਨੇ ਮਈ 2017 ਵਿਚ ਅਲਾਬਾਮਾ ਸਥਿਤ ਜੇ ਐਂਡ ਪੀ ਖਾਮਕੇਨ ਇੰਡਸਟਰੀਜ਼ ਦੇ ਕਾਰੋਬਾਰੀ ਸਾਧਨ ਖਰੀਦੇ ਸਨ। ਸਰਕਾਰ ਦਾ ਦੋਸ਼ ਹੈ ਕਿ ਇਸ ਤੋਂ ਬਾਅਦ ਨਵੰਬਰ 2019 ਤੱਕ ਕੰਪਨੀਆਂ ਨੇ ਚੀਨ ਵਿਚ ਬਣੇ ਵੱਖ-ਵੱਖ ਉਪਕਰਨ ਸਿੱਧੇ ਜਾਂ ਹੋਰ ਠੇਕੇਦਾਰਾਂ ਰਾਹੀਂ ਅਮਰੀਕੀ ਫ਼ੌਜ ਨੂੰ ਮੁਹੱਈਆ ਕਰਵਾਏ। ਇਨ੍ਹਾਂ ਵਿਚ ਐਲੂਮੀਨੀਅਮ ਦੇ ਮੇਜ਼, ਸਾਮਾਨ ਰੱਖਣ ਵਾਲੇ ਰੈਕ, ਵਾਹਨਾਂ ਦੇ ਪੈਨਲ, ਪੁਲੀਆਂ, ਮਾਊਂਟਿੰਗ ਬਰੈਕਟ ਅਤੇ ਗੋਲਾ-ਬਾਰੂਦ ਸੰਭਾਲਣ ਵਾਲੇ ਉਪਕਰਨ ਸ਼ਾਮਿਲ ਸਨ।ਅਮਰੀਕਾ ਦੇ ਬਾਇ ਅਮਰੀਕਨ ਐਕਟ ਤਹਿਤ ਸਰਕਾਰੀ ਖਰੀਦ ਵਿਚ ਆਮ ਤੌਰ ’ਤੇ ਅਮਰੀਕਾ ਵਿਚ ਬਣੇ ਸਾਮਾਨ ਨੂੰ ਤਰਜੀਹ ਦਿੱਤੀ ਜਾਂਦੀ ਹੈ। ਫ਼ੌਜੀ ਉਪਕਰਨਾਂ ਵਿਚ ਵਰਤੀਆਂ ਜਾਣ ਵਾਲੀਆਂ ਕੁਝ ਖਾਸ ਧਾਤਾਂ ਲਈ ਵੀ ਸਖ਼ਤ ਨਿਯਮ ਹਨ। ਇਨ੍ਹਾਂ ਨਿਯਮਾਂ ਤਹਿਤ ਕੁਝ ਦੇਸ਼ਾਂ ਨੂੰ ਛੋਟ ਮਿਲਦੀ ਹੈ ਪਰ ਚੀਨ ਉਨ੍ਹਾਂ ਵਿੱਚ ਸ਼ਾਮਿਲ ਨਹੀਂ ਹੈ।ਅਮਰੀਕੀ ਅਟਾਰਨੀ ਥਾਮਸ ਗੋਵਨ ਨੇ ਕਿਹਾ ਕਿ ਸਰਕਾਰੀ ਠੇਕਿਆਂ ਵਿੱਚ ਟੈਕਸਦਾਤਾਵਾਂ ਦੇ ਪੈਸੇ ਦੀ ਸਹੀ ਵਰਤੋਂ ਅਤੇ ਅਮਰੀਕੀ ਕੰਪਨੀਆਂ ਨੂੰ ਬਰਾਬਰ ਮੌਕੇ ਦੇਣਾ ਜ਼ਰੂਰੀ ਹੈ। ਉਨ੍ਹਾਂ ਕਿਹਾ ਕਿ ਫ਼ੌਜ ਨਾਲ ਕਾਰੋਬਾਰ ਕਰਨ ਵਾਲੀਆਂ ਕੰਪਨੀਆਂ ਨੂੰ ਨਿਯਮਾਂ ਦੀ ਪਾਲਣਾ ਕਰਨ ਦੇ ਨਾਲ ਸਰਕਾਰ ਨੂੰ ਸਹੀ ਜਾਣਕਾਰੀ ਦੇਣੀ ਚਾਹੀਦੀ ਹੈ।ਇਸ ਮਾਮਲੇ ਦਾ ਖ਼ੁਲਾਸਾ ਕਰਨ ਵਿੱਚ ਜੇ ਐਂਡ ਪੀ ਖਾਮਕੇਨ ਇੰਡਸਟਰੀਜ਼ ਦੇ ਦੋ ਸੰਸਥਾਪਕਾਂ ਅਤੇ ਸਾਬਕਾ ਮੁਲਾਜ਼ਮਾਂ ਦੀ ਵੀ ਭੂਮਿਕਾ ਰਹੀ, ਜਿਨ੍ਹਾਂ ਨੇ ਕਥਿਤ ਧੋਖਾਧੜੀ ਸਬੰਧੀ ਮੁਕੱਦਮਾ ਦਾਇਰ ਕੀਤਾ ਸੀ। ਕਾਨੂੰਨ ਅਨੁਸਾਰ ਉਨ੍ਹਾਂ ਨੂੰ ਸਮਝੌਤੇ ਦੀ ਰਕਮ ਵਿਚੋਂ ਇੱਕ ਹਿੱਸਾ ਮਿਲੇਗਾ।ਮਾਮਲੇ ਦੀ ਜਾਂਚ ਅਮਰੀਕੀ ਹਵਾਈ ਫ਼ੌਜ, ਰੱਖਿਆ ਵਿਭਾਗ ਅਤੇ ਫ਼ੌਜ ਦੀਆਂ ਜਾਂਚ ਏਜੰਸੀਆਂ ਵਲੋਂ ਕੀਤੀ ਗਈ। ਸਮਝੌਤੇ ਦੇ ਵੇਰਵੇ ਅਲਾਬਾਮਾ ਦੇ ਮੋਂਟਗੋਮਰੀ ਸ਼ਹਿਰ ਦੀ ਸੰਘੀ ਅਦਾਲਤ ਵਿੱਚ ਜਨਤਕ ਕੀਤੇ ਗਏ ਹਨ।ਨਿਆਂ ਵਿਭਾਗ ਨੇ ਸਪੱਸ਼ਟ ਕੀਤਾ ਹੈ ਕਿ 10 ਲੱਖ ਡਾਲਰ ਦਾ ਸਮਝੌਤਾ ਦੋਸ਼ਾਂ ਦੇ ਨਿਪਟਾਰੇ ਲਈ ਕੀਤਾ ਗਿਆ ਹੈ। ਅਦਾਲਤ ਵਲੋਂ ਰੰਗਨਾਥਨ ਜਾਂ ਉਸ ਦੀਆਂ ਕੰਪਨੀਆਂ ਨੂੰ ਦੋਸ਼ੀ ਨਹੀਂ ਠਹਿਰਾਇਆ ਗਿਆ ਅਤੇ ਨਾ ਹੀ ਉਨ੍ਹਾਂ ਦੀ ਕਾਨੂੰਨੀ ਜ਼ਿੰਮੇਵਾਰੀ ਸਾਬਤ ਹੋਈ ਹੈ।
