ਏਅਰ ਟਰੈਫਿਕ ਦਾ ਦੂਜੇ ਦਿਨ ਵੀ ਅਸਰ ਗਲਾਸਗੋ-ਐਡਿਨਬਰਾ ਦੀਆਂ ਉਡਾਣਾਂ ਰੱਦ, ਯਾਤਰੀ ਖੱਜਲ-ਖੁਆਰ

ਗਲਾਸਗੋ, 9 ਸਤੰਬਰ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਬਰਤਾਨੀਆ ਦੇ ਏਅਰ ਟਰੈਫਿਕ ਕੰਟਰੋਲ ਸਿਸਟਮ ਵਿਚ ਆਈ ਤਕਨੀਕੀ ਖਰਾਬੀ ਦਾ ਅਸਰ ਅੱਜ ਲਗਾਤਾਰ ਦੂਜੇ ਦਿਨ ਵੀ ਸਕਾਟਲੈਂਡ ਦੇ ਹਵਾਈ ਅੱਡਿਆਂ ’ਤੇ ਜਾਰੀ ਰਿਹਾ। ਗਲਾਸਗੋ ਅਤੇ ਐਡਿਨਬਰਾ ਤੋਂ ਲੰਡਨ ਸਮੇਤ ਕਈ ਸ਼ਹਿਰਾਂ ਲਈ ਉਡਾਣਾਂ ਰੱਦ ਜਾਂ ਕਈ ਘੰਟੇ ਦੇਰੀ ਨਾਲ ਚੱਲੀਆਂ। ਗਲਾਸਗੋ ਤੋਂ ਲੰਡਨ ਹੀਥਰੋ ਅਤੇ ਗੈਟਵਿਕ ਦੀਆਂ ਕੁਝ ਉਡਾਣਾਂ ਸਮੇਤ ਲੂਟਨ ਜਾਣ ਵਾਲੀ ਉਡਾਣ ਰੱਦ ਹੋਈ, ਜਦਕਿ ਐਡਿਨਬਰਾ ਤੋਂ ਬ੍ਰਿਸਟਲ ਦੀ ਉਡਾਣ ਰੱਦ ਅਤੇ ਸਟੈਨਸਟੈਡ ਜਾਣ ਵਾਲੀ ਉਡਾਣ ਕਈ ਘੰਟੇ ਲੇਟ ਹੋਈ। ਇਸ ਕਾਰਨ ਵੱਡੀ ਗਿਣਤੀ ਵਿਚ ਯਾਤਰੀਆਂ ਨੂੰ ਖੱਜਲ-ਖੁਆਰੀ ਦਾ ਸਾਹਮਣਾ ਕਰਨਾ ਪਿਆ।ਨੈਸ਼ਨਲ ਏਅਰ ਟਰੈਫਿਕ ਸਰਵਿਸ ਮੁਤਾਬਕ ਤਕਨੀਕੀ ਸਮੱਸਿਆ ਮੰਗਲਵਾਰ ਸ਼ਾਮ ਨੂੰ ਠੀਕ ਕਰ ਦਿੱਤੀ ਗਈ ਸੀ, ਪਰ ਪਿਛਲੇ ਦਿਨ ਦੀ ਵੱਡੀ ਗੜਬੜ ਕਾਰਨ ਜਹਾਜ਼ ਅਤੇ ਅਮਲੇ ਨਿਰਧਾਰਤ ਥਾਵਾਂ ’ਤੇ ਨਾ ਹੋਣ ਕਰਕੇ ਦੂਜੇ ਦਿਨ ਵੀ ਉਡਾਣਾਂ ਪ੍ਰਭਾਵਿਤ ਹੋਈਆਂ। ਮੰਗਲਵਾਰ ਨੂੰ ਯੂਕੇ ਵਿੱਚ ਆਉਣ-ਜਾਣ ਵਾਲੀਆਂ ਲਗਭਗ 1,300 ਉਡਾਣਾਂ ਰੱਦ ਹੋਈਆਂ ਸਨ। ਹਵਾਈ ਅੱਡਿਆਂ ਵਲੋਂ ਯਾਤਰੀਆਂ ਨੂੰ ਘਰੋਂ ਰਵਾਨਾ ਹੋਣ ਤੋਂ ਪਹਿਲਾਂ ਆਪਣੀ ਏਅਰਲਾਈਨ ਨਾਲ ਉਡਾਣ ਦੀ ਤਾਜ਼ਾ ਸਥਿਤੀ ਦੀ ਜਾਂਚ ਕਰਨ ਦੀ ਸਲਾਹ ਦਿੱਤੀ ਗਈ ਹੈ।