ਮੁੰਬਈ, 18 ਸਤੰਬਰ (ਪੀ. ਟੀ. ਆਈ.)-ਫਿਲਮ ਫੈਡਰੇਸ਼ਨ ਆਫ਼ ਇੰਡੀਆ ਨੇ ਸ਼ੁੱਕਰਵਾਰ ਨੂੰ ਐਲਾਨ ਕੀਤਾ ਕਿ ਮਰਾਠੀ ਫਿਲਮ ‘ਗੋਂਧਲ’ ਨੂੰ ਆਸਕਰ 2027 ਲਈ ਭਾਰਤ ਦੀ ਅਧਿਕਾਰਤ ਐਂਟਰੀ ਵਜੋਂ ਚੁਣਿਆ ਗਿਆ ਹੈ। ਸੰਤੋਸ਼ ਦਾਵਖਰ ਵਲੋਂ ਲਿਖੀ ਅਤੇ ਨਿਰਦੇਸ਼ਿਤ ਇਹ ਫਿਲਮ ਪੇਂਡੂ ਮਹਾਰਾਸ਼ਟਰ ’ਤੇ ਆਧਾਰਿਤ ਹੈ ਅਤੇ ਇਕ ਨਵੇਂ ਵਿਆਹੇ ਜੋੜੇ ਨਾਲ ਜੁੜੀ ਇਕ ਰਵਾਇਤੀ ਰਸਮ ਦੌਰਾਨ ਇਕ ਰਾਤ ਦੀ ਘਟਨਾਕ੍ਰਮ ਨੂੰ ਦਰਸਾਉਂਦੀ ਹੈ। ਚੋਣ ਕਮੇਟੀ ਦੇ ਚੇਅਰਮੈਨ ਪੀ. ਸ਼ੇਸ਼ਾਦਰੀ ਨੇ ਦੱਸਿਆ ਕਿ 33 ਫਿਲਮਾਂ ਦੀ ਸੂਚੀ ਵਿਚੋਂ ਇਸ ਫਿਲਮ ਨੂੰ 99ਵੇਂ ਅਕੈਡਮੀ ਐਵਾਰਡਾਂ ਲਈ ‘ਬੈਸਟ ਇੰਟਰਨੈਸ਼ਨਲ ਫੀਚਰ’ (ਸਰਵੋਤਮ ਅੰਤਰਰਾਸ਼ਟਰੀ ਫੀਚਰ) ਸ਼੍ਰੇਣੀ ਵਾਸਤੇ ਭਾਰਤ ਵਲੋਂ ਨਾਮਜ਼ਦਗੀ ਲਈ ਚੁਣਿਆ ਗਿਆ ਹੈ। ‘ਗੋਂਧਲ’ ਤੋਂ ਇਲਾਵਾ ‘ਅੰਘ’ ਅਤੇ ‘ਇੱਕੀਸ’ ਵੀ ਚੋਟੀ ਦੀਆਂ ਤਿੰਨ ਫਿਲਮਾਂ ਦੀ ਸੂਚੀ ਵਿਚ ਸ਼ਾਮਿਲ ਸਨ।‘ਗੋਂਧਲ’ ਦਾ ਵਿਸ਼ਵ ਪ੍ਰੀਮੀਅਰ 2025 ਵਿਚ ਗੋਆ ਵਿਖੇ 56ਵੇਂ ਅੰਤਰਰਾਸ਼ਟਰੀ ਫਿਲਮ ਫੈਸਟੀਵਲ ਆਫ ਇੰਡੀਆ (ਆਈ.ਐਫ.ਐਫ.ਆਈ.) ਦੇ ‘ਇੰਡੀਅਨ ਪੈਨੋਰਮਾ’ ਭਾਗ ਵਿਚ ਹੋਇਆ ਸੀ। ਦਾਵਖਰ ਨੇ ਇਸ ਫੈਸਟੀਵਲ ਵਿਚ ਸਰਬੋਤਮ ਨਿਰਦੇਸ਼ਕ ਲਈ ‘ਸਿਲਵਰ ਪੀਕੌਕ’ ਪੁਰਸਕਾਰ ਜਿੱਤਿਆ ਸੀ।
