ਸਾਰਨ (ਬਿਹਾਰ), 17 ਅਕਤੂਬਰ (ਪੀ. ਟੀ. ਆਈ.)-ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਸ਼ੁੱਕਰਵਾਰ ਨੂੰ ਗੈਂਗਸਟਰ ਤੋਂ ਸਿਆਸਤਦਾਨ ਬਣੇ ਮਰਹੂਮ ਨੇਤਾ ਮੁਹੰਮਦ ਸ਼ਹਾਬੁਦੀਨ ਦੇ ਪੁੱਤਰ ਓਸਾਮਾ ਸ਼ਹਾਬ ਨੂੰ ਟਿਕਟ ਦੇਣ ਲਈ ਵਿਰੋਧੀ ਦਲ ਆਰ.ਜੇ.ਡੀ. 'ਤੇ ਨਿਸ਼ਾਨਾ ਸਾਧਿਆ ਅਤੇ ਪੁੱਛਿਆ ਕਿ ਜੇਕਰ ਉਹ ਅਜਿਹੇ ਉਮੀਦਵਾਰਾਂ ਨੂੰ ਖੜ੍ਹਾ ਕਰਦੇ ਹਨ ਤਾਂ ਬਿਹਾਰ ਦੇ ਲੋਕਾਂ ਦੀ ਸੁਰੱਖਿਆ ਕਿਵੇਂ ਯਕੀਨੀ ਹੋਵੇਗੀ | ਸਾਰਨ ਜ਼ਿਲ੍ਹੇ ਵਿਚ ਇਕ ਚੋਣ ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਅਮਿਤ ਸ਼ਾਹ ਨੇ ਦਾਅਵਾ ਕੀਤਾ ਕਿ ਐਨ.ਡੀ.ਏ. 20 ਸਾਲਾਂ ਵਿਚ ਸਭ ਤੋਂ ਵੱਡੇ ਬਹੁਮਤ ਨਾਲ ਰਾਜ 'ਚ ਸੱਤਾ ਵਿਚ ਵਾਪਸ ਆਵੇਗਾ | ਉਨ੍ਹਾਂ ਰੈਲੀ ਸੰਬੋਧਨ ਕਰਦੇ ਹੋਏ ਕਿਹਾ ਕਿ ਮੈਂ ਹੁਣੇ ਆਉਣ ਵਾਲੀਆਂ ਚੋਣਾਂ ਲਈ ਆਰ.ਜੇ.ਡੀ. ਉਮੀਦਵਾਰਾਂ ਦੀ ਸੂਚੀ ਦੇਖੀ ਹੈ¢ ਸ਼ਹਾਬੁਦੀਨ ਦੇ ਪੁੱਤਰ ਦਾ ਨਾਮ ਸੂਚੀ ਵਿਚ ਹੈ | ਤੁਸੀਂ ਮੈਨੂੰ ਦੱਸੋ, ਜੇਕਰ ਆਰ.ਜੇ.ਡੀ. ਸ਼ਹਾਬੁਦੀਨ ਦੇ ਪੁੱਤਰ ਨੂੰ ਟਿਕਟ ਦਿੰਦੀ ਹੈ, ਤਾਂ ਬਿਹਾਰ ਕਿਵੇਂ ਸੁਰੱਖਿਅਤ ਰਹਿ ਸਕਦਾ ਹੈ? ਤੁਹਾਨੂੰ ਲੋਕਾਂ ਨੂੰ ਆਰ.ਜੇ.ਡੀ. ਵਰਗੀਆਂ ਪਾਰਟੀਆਂ ਤੋਂ ਸਾਵਧਾਨ ਰਹਿਣ ਦੀ ਲੋੜ ਹੈ |
