ਅੱਜ ਪੰਜਾਬ ਭਰ ’ਚ ਬੰਦ ਰਹਿਣਗੀਆਂ ਸਕੂਲ ਵੈਨਾਂ, ਬਠਿੰਡਾ ’ਚ ਹੋਵੇਗੀ ਸੂਬਾ ਪੱਧਰੀ ਰੈਲੀ

ਬਠਿੰਡਾ, 2 ਸਤੰਬਰ (ਸੱਤਪਾਲ ਸਿੰਘ ਸਿਵੀਆਂ)-ਪੰਜਾਬ ਭਰ ਵਿਚ ਨਿੱਜੀ ਸਕੂਲਾਂ/ਕਾਲਜਾਂ ਦੇ ਵਿਦਿਆਰਥੀਆਂ ਦੀ ਆਵਾਜਾਈ ਨਾਲ ਜੁੜੇ ਵੈਨ ਤੇ ਬੱਸ ਚਾਲਕਾਂ ਵਲੋਂ ਸੂਬਾ ਸਰਕਾਰ ਦੀਆਂ ਨਵੀਆਂ ਟਰਾਂਸਪੋਰਟ ਨੀਤੀਆਂ ਦੇ ਵਿਰੋਧ ਅੱਜ ਪੰਜਾਬ ਭਰ ਵਿਚ ਇਕ ਰੋਜ਼ਾ ਹੜਤਾਲ ਕੀਤੀ ਜਾ ਰਹੀ ਹੈ, ਜਿਸ ਦੌਰਾਨ ਸਕੂਲ/ਕਾਲਜ ਵੈਨਾਂ ਤੇ ਬੱਸਾਂ ਦਾ ਪੂਰਨ ਤੌਰ ’ਤੇ ਚੱਕਾ ਜਾਮ ਰਹੇਗਾ । ਇਸ ਦੌਰਾਨ ਪੰਜਾਬ ਭਰ ਦੇ ਸਕੂਲ ਵੈਨ ਚਾਲਕ ਵਲੋਂ ਬਠਿੰਡਾ ਦੀ ਦਾਣਾ ਮੰਡੀ ਵਿਚ ਸੂਬਾ ਪੱਧਰੀ ਮਹਾਂ-ਪੰਚਾਇਤ ਤੇ ਰੋਸ ਰੈਲੀ ਕੀਤੀ ਜਾਵੇਗੀ । ਪੰਜਾਬ ਸਕੂਲ/ਕਾਲਜ ਵੈਨ ਆਪੇ੍ਰਟਰਜ਼ ਐਸੋਸੀਏਸ਼ਨ ਦੇ ਸੂਬਾ ਪ੍ਰਧਾਨ ਗੁਰਪ੍ਰੀਤ ਸਿੰਘ ਨੇ ਦੱਸਿਆ ਕਿ ਹੈਵੀ ਵਾਹਨ ਲਾਇਸੈਂਸ ਬਣਵਾਉਣ ਜਾਂ ਨਵੀਨੀਕਰਨ ਲਈ ਹੁਣ 45 ਦਿਨਾਂ ਦੀ ਟ੍ਰੇਨਿੰਗ ਲਾਜ਼ਮੀ ਕਰ ਦਿੱਤੀ ਹੈ, ਜਿਸ ’ਤੇ ਲਗਭਗ 14 ਹਜ਼ਾਰ ਰੁਪਏ ਦਾ ਖਰਚਾ ਆਉਂਦਾ ਹੈ ਜਦਕਿ ਪਹਿਲਾਂ ਇਹ ਟ੍ਰੇਨਿੰਗ ਕੁਝ ਦਿਨਾਂ ਵਿਚ ਕਾਫ਼ੀ ਘੱਟ ਖਰਚੇ ਵਿਚ ਹੋ ਜਾਂਦੀ ਸੀ। ਇਸ ਤੋਂ ਇਲਾਵਾ ਸਕੂਲ ਵੈਨਾਂ ਦੀ ਪਾਸਿੰਗ, ਟੈਕਸਾਂ ਤੇ ਜੀ.ਪੀ.ਐਸ. ਨਿਯਮਾਂ ਵੀ ਉਨ੍ਹਾਂ ਲਈ ਵੱਡੇ ਆਰਥਿਕ ਸਮੱਸਿਆ ਬਣ ਰਹੇ ਹਨ।