ਲਾਡੋਵਾਲ ਡਿਸਪੈਂਸਰੀ ’ ਚੋਂ ਚੋਰਾਂ ਨੇ ਗੈਸ ਸਿਲੰਡਰ , ਇਨਵਰਟਰ , ਸਟੈੱਬਲਾਈਜ਼ਰ ਤੇ ਹੋਰ ਸਾਮਾਨ ਕੀਤਾ ਚੋਰੀ
ਲਾਡੋਵਾਲ, 30 ਸਤੰਬਰ (ਬਲਬੀਰ ਸਿੰਘ ਰਾਣਾ)- ਸਥਾਨਕ ਕਸਬਾ ਲਾਡੋਵਾਲ ਦੀ ਸਰਕਾਰੀ ਮਿੰਨੀ ਪੀ. ਐਚ.
ਲਾਡੋਵਾਲ, 30 ਸਤੰਬਰ (ਬਲਬੀਰ ਸਿੰਘ ਰਾਣਾ)- ਸਥਾਨਕ ਕਸਬਾ ਲਾਡੋਵਾਲ ਦੀ ਸਰਕਾਰੀ ਮਿੰਨੀ ਪੀ.ਐਚ.ਸੀ. ਡਿਸਪੈਂਸਰੀ ਵਿਚ ਜਿੱਥੇ ਗਰਭਵਤੀ ਔਰਤਾਂ ਅਤੇ ਬੱਚਿਆਂ ਦੇ ਟੀਕੇ ਲਗਾਏ ਜਾਂਦੇ ਹਨ, ਵਿਚ ਬੀਤੀ ਰਾਤ ਨੂੰ ਚੋਰਾਂ ਨੇ ਆਪਣਾ ਹੱਥ ਸਾਫ਼ ਕਰਦਿਆਂ ਡਿਸਪੈਂਸਰੀ ਵਿਚੋਂ ਮੇਨ ਦਰਵਾਜ਼ੇ ਦਾ ਤਾਲਾ ਤੋੜ ਕੇ ਅੰਦਰੋਂ ਗੈਸ ਸਲੰਡਰ, ਇਲੈੱਕਟ੍ਰਾਨਿਕ ਭਾਰ ਤੋਲਣ ਵਾਲੀ ਮਸ਼ੀਨ, ਨਵਾਂ ਇਨਵਰਟਰ, ਫ਼ਰਿਜ ਦਾ ਸਟੈੱਬਲਾਈਜਰ, ਸਰਿੰਜਾਂ ਅਤੇ ਹੋਰ ਕੀਮਤੀ ਸਾਮਾਨ ਚੋਰੀ ਕਰ ਲਿਆ। ਇਸ ਸਬੰਧੀ ਗੱਲਬਾਤ ਕਰਦਿਆਂ ਸੀ.ਐਚ.ਓ. ਸੀਮਾ ਸਿੱਧੂ ਤੇ ਸਤਪਾਲ ਨੇ ਦੱਸਿਆ ਕਿ ਚੋਰੀ ਬਾਰੇ ਉਦੋਂ ਪਤਾ ਲੱਗਿਆ, ਜਦੋਂ ਡਿਸਪੈਂਸਰੀ ਦੇ ਮੇਨ ਦਰਵਾਜ਼ੇ ਦਾ ਤਾਲਾ ਟੁੱਟਿਆ ਵੇਖਿਆ ਤੇ ਅੰਦਰੋਂ ਬਹੁਤ ਸਾਰਾ ਸਾਮਾਨ ਵੀ ਗ਼ਾਇਬ ਸੀ। ਉਨ੍ਹਾਂ ਦੱਸਿਆ ਕਿ ਚੋਰੀ ਹੋਇਆ ਸਾਰਾ ਸਾਮਾਨ ਅਰੋਗਿਆ ਕੇਂਦਰ ਨਾਲ ਸੰਬੰਧਿਤ ਸੀ, ਜੋ ਕਿ ਕਾਫ਼ੀ ਕੀਮਤੀ ਸਮਾਨ ਸੀ ਜਿਸ ਸਬੰਧੀ ਥਾਣਾ ਲਾਡੋਵਾਲ ਵਿਚ ਲਿਖਤੀ ਸ਼ਿਕਾਇਤ ਵੀ ਦਿੱਤੀ ਗਈ ਹੈ। ਚੋਰੀ ਦੀ ਖ਼ਬਰ ਸੁਣਦਿਆਂ ਹੀ ਪਿੰਡ ਦੇ ਸਰਪੰਚ ਵੀਰ ਚੰਦ ਕਲਿਆਣ ਵੀ ਮੌਕੇ ‘ਤੇ ਪਹੁੰਚੇ ਜਿਨ੍ਹਾਂ ਨੇ ਸਖ਼ਤ ਸ਼ਬਦਾਂ ਵਿਚ ਨਿਖੇਧੀ ਕਰਦਿਆਂ ਕਿਹਾ ਕਿ ਜਿੱਥੇ ਗ਼ਰੀਬ ਤੇ ਲੋੜਵੰਦ ਲੋਕ ਆਪਣਾ ਇਲਾਜ ਕਰਾਉਣ ਵਾਸਤੇ ਆਉਂਦੇ ਹਨ, ਚੋਰਾਂ ਨੇ ਉਸ ਜਗ੍ਹਾ ਨੂੰ ਵੀ ਨਹੀਂ ਬਖ਼ਸ਼ਿਆ। ਇਸ ਮੌਕੇ ਡਿਸਪੈਂਸਰੀ ਦੇ ਸਟਾਫ਼ ਮੈਂਬਰਾਂ ਤੇ ਸਰਪੰਚ ਬੀਰ ਚੰਦ ਕਲਿਆਣ ਨੇ ਜ਼ਿਲ੍ਹਾ ਪੁਲਿਸ ਪ੍ਰਸ਼ਾਸਨ ਤੋਂ ਚੋਰਾਂ ਖ਼ਿਲਾਫ਼ ਸਖ਼ਤ ਤੋਂ ਸਖ਼ਤ ਕਾਰਵਾਈ ਕਰਨ ਦੀ ਮੰਗ ਕੀਤੀ ਗਈ।
