ਨਵੀਂ ਦਿੱਲੀ, 17 ਅਕਤੂਬਰ (ਏਜੰਸੀ)-ਗ੍ਰਹਿ ਮੰਤਰਾਲੇ ਨੇ ਲੇਹ 'ਚ 24 ਸਤੰਬਰ ਨੂੰ ਵਾਪਰੀ ਹਿੰਸਾ ਦੀ ਘਟਨਾ ਦੀ ਜਾਂਚ ਦੇ ਆਦੇਸ਼ ਦੇ ਦਿੱਤੇ ਹਨ | ਇਹ ਜਾਂਚ ਸੁਪਰੀਮ ਕੋਰਟ ਦੇ ਸੇਵਾਮੁਕਤ ਜਸਟਿਸ ਬੀ.ਐਸ. ਚੌਹਾਨ ਵਲੋਂ ਕੀਤੀ ਜਾਏਗੀ ਤਾਂ ਕਿ ਇਹ ਪਤਾ ਲਗਾਇਆ ਜਾ ਸਕੇ ਕਿਹੜੀਆਂ ਸਥਿਤੀਆਂ ਕਾਰਨ ਕਾਨੂੰਨ ਵਿਵਸਥਾ ਦੀ ਗੰਭੀਰ ਸਥਿਤੀ ਪੈਦਾ ਹੋਈ, ਪੁਲਿਸ ਕਾਰਵਾਈ ਹੋਈ ਜਿਸ ਦੇ ਨਤੀਜੇ ਵਜੋਂ ਚਾਰ ਲੋਕਾਂ ਦੀ ਮੌਤ ਹੋ ਗਈ | ਸੇਵਾਮੁਕਤ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਮੋਹਨ ਸਿੰਘ ਪਰਿਹਾਰ ਨਿਆਂਇਕ ਸਕੱਤਰ ਵਜੋਂ ਕੰਮ ਕਰਨਗੇ, ਜਦੋਂ ਕਿ ਆਈ.ਏ.ਐਸ. ਅਧਿਕਾਰੀ ਤੁਸ਼ਾਰ ਆਨੰਦ ਜਾਂਚ ਕਮਿਸ਼ਨ ਦੇ ਪ੍ਰਸ਼ਾਸਕੀ ਸਕੱਤਰ ਹੋਣਗੇ | ਇਕ ਅਧਿਕਾਰਕ ਬਿਆਨ ਅਨੁਸਾਰ ਸਰਕਾਰ ਹਮੇਸ਼ਾਂ ਕਿਸੇ ਵੀ ਸਮੇਂ ਗੱਲਬਾਤ ਲਈ ਤਿਆਰ ਰਹੀ ਹੈ ਅਤੇ ਉਹ ਲੱਦਾਖ਼ 'ਤੇ ਉਚ ਅਧਿਕਾਰ ਕਮੇਟੀ ਜਾਂ ਅਜਿਹੇ ਕਿਸੇ ਵੀ ਮੰਚ ਜ਼ਰੀਏ ਅਪੈਕਸ ਸੰਗਠਨ ਲੇਹ (ਏ.ਬੀ.ਐਲ.) ਅਤੇ ਕਾਰਗਿਲ ਡੈਮੋਕ੍ਰੇਟਿਕ ਗਠਜੋੜ (ਕੇ.ਡੀ.ਏ.) ਨਾਲ ਚਰਚਾ ਦਾ ਸਵਾਗਤ ਕਰਦੀ ਰਹੇਗੀ |
