ਓਵਰਲੋਡ ਟਿੱਪਰਾਂ ਤੇ ਟਰੈਕਟਰ-ਟਰਾਲੀਆਂ ਨੇ ਡੇਰਾਬੱਸੀ ਹਲਕੇ ਦੇ ਲੋਕਾਂ ਦੀ ਜਾਨ ਆਫ਼ਤ 'ਚ ਪਾਈ <br/>
ਅਜੀਤ ਡੈਸਕ
05-11-2025
1.66 ਕਰੋੜ ਰੁ. 'ਤੇ ਫੇਰਿਆ ਪਾਣੀ
ਕੁਝ ਸਮਾਂ ਪਹਿਲਾਂ 1.66 ਕਰੋੜ ਰੁ. ਖ਼ਰਚ ਕੇ ਮੁਬਾਰਕਪੁਰ ਨੇੜਲੇ ਰੇਲਵੇ ਅੰਡਰ-ਪਾਥ ਦਾ ਨਵੀਨੀਕਰਨ ਕੀਤਾ ਗਿਆ ਸੀ, ਪਰ ਹੁਣ ਮੁੜ ਇਸ ਅੰਡਰ-ਪਾਥ ਦੀ ਹਾਲਤ ਖ਼ਸਤਾ ਹੋ ਗਈ ਹੈ, ਜਿਸ ਦਾ ਮੁੱਖ ਕਾਰਨ ਇਥੋਂ ਓਵਰਲੋਡ ਵਾਹਨਾਂ ਦਾ ਗੁਜਰਨਾ ਹੈ | ਇਨ੍ਹਾਂ ਓਵਰਲੋਡ ਵਾਹਨਾਂ ਦੀ ਲਪੇਟ 'ਚ ਆ ਕੇ ਦਰਜਨਾਂ ਬੇਕਸੂਰ ਲੋਕਾਂ ਦੀਆਂ ਜਾਨਾਂ ਜਾ ਚੁੱਕੀਆਂ ਹਨ ਤੇ ਦਿਨੋਂ ਦਿਨ ਵਧ ਰਹੇ ਹਾਦਸਿਆਂ ਦੇ ਬਾਵਜੂਦ ਵੀ ਪ੍ਰਸ਼ਾਸਨ ਇਨ੍ਹਾਂ 'ਤੇ ਨੱਥ ਪਾਉਣ 'ਚ ਬੇਵੱਸ ਨਜ਼ਰ ਆ ਰਿਹਾ ਹੈ |
ਸਾਲ ਬਾਅਦ ਵੀ ਨਹੀਂ ਤਿਆਰ ਹੋਇਆ ਰੂਟ ਮੈਪ
ਲਾਲੜੂ ਵਿਖੇ ਟਿੱਪਰ ਦੀ ਲਪੇਟ 'ਚ ਆਉਣ ਕਰਕੇ ਇਕ ਵਿਅਕਤੀ ਦੀ ਮੌਤ ਹੋਣ ਤੋਂ ਬਾਅਦ ਲੋਕਾਂ ਨੇ ਹੰਗਾਮਾ ਕਰ ਦਿੱਤਾ ਸੀ | ਉਸ ਸਮੇਂ ਹਰਕਤ 'ਚ ਆਉਂਦਿਆਂ ਐਸ. ਡੀ. ਐਮ. ਡੇਰਾਬੱਸੀ ਨੇ ਟਿੱਪਰਾਂ 'ਤੇ ਨਕੇਲ ਪਾਉਣ ਲਈ ਮਾਈਨਿੰਗ ਵਿਭਾਗ ਨੂੰ ਨੋਟਿਸ ਜਾਰੀ ਕਰਦੇ ਹੋਏ ਮਾਈਨਿੰਗ ਦੇ ਕੰਮ 'ਚ ਲੱਗੇ ਵਾਹਨਾਂ ਦੀ ਆਵਾਜਾਈ ਲਈ ਰੂਟ ਮੈਪ ਤਿਆਰ ਕਰਨ ਲਈ ਕਿਹਾ ਸੀ, ਪਰ ਕਰੀਬ ਇਕ ਸਾਲ ਬੀਤ ਜਾਣ ਮਗਰੋਂ ਵੀ ਇਸ ਸੰਬੰਧੀ ਕੋਈ ਕਦਮ ਨਹੀਂ ਚੁੱਕਿਆ ਗਿਆ ਤੇ ਮੌਤ ਦੇ ਦੂਤ ਬਣ ਕੇ ਓਵਰਲੋਡ ਟਿੱਪਰ ਅੱਜ ਵੀ ਬੇਖ਼ੌਫ਼ ਸੜਕਾਂ 'ਤੇ ਦੌੜ ਰਹੇ ਹਨ | ਦਿਨ ਸਮੇਂ ਤਹਿਸੀਲ ਸੜਕ 'ਤੇ ਇਹ ਟਿੱਪਰ ਦੌੜਦੇ ਆਮ ਦੇਖੇ ਜਾ ਸਕਦੇ ਹਨ, ਜਦਕਿ ਦਿਨ ਸਮੇਂ ਇਥੋਂ ਇਨ੍ਹਾਂ ਦੇ ਗੁਜਰਨ 'ਤੇ ਪਾਬੰਦੀ ਲਗਾਈ ਹੋਈ ਹੈ | ਲੋਕਾਂ ਨੇ ਪ੍ਰਸ਼ਾਸਨ ਤੋਂ ਮੰਗ ਕੀਤੀ ਹੈ ਕਿ ਇਨ੍ਹਾਂ ਵਾਹਨਾਂ ਦੀ ਆਵਾਜਾਈ ਲਈ ਸਮਾਂ ਤੈਅ ਕੀਤਾ ਜਾਵੇ ਅਤੇ ਨਾਲ ਹੀ ਇਨ੍ਹਾਂ ਨੂੰ ਢੱਕਣ ਤੇ ਨਿਯਮ ਲਾਗੂ ਕਰਨ ਵਾਲੀ ਕਾਰਵਾਈ ਅਮਲ 'ਚ ਲਿਆਂਦੀ ਜਾਵੇ |
