ਸੰਗਰੂਰ ਦੇ ਦੋ ਵਸਨੀਕ ਹੋਏ ਸਾਈਬਰ ਠੱਗੀ ਦਾ ਸ਼ਿਕਾਰ
ਇੱਕ ਨਾਲ 13.50 ਲੱਖ ਅਤੇ ਦੂਜੇ ਨਾਲ ਵੱਜੀ 2 ਲੱਖ ਦੀ ਠੱਗੀ
ਸੰਗਰੂਰ, 15 ਅਕਤੂਬਰ (ਧੀਰਜ ਪਸ਼ੌਰੀਆ )-ਡਿਜੀਟਲ ਯੁੱਗ ਵਿੱਚ ਆਨਲਾਈਨ ਬੈਂਕਿੰਗ, ਯੂ. ਪੀ.
ਸੰਗਰੂਰ, 15 ਅਕਤੂਬਰ (ਧੀਰਜ ਪਸ਼ੌਰੀਆ )-ਡਿਜੀਟਲ ਯੁੱਗ ਵਿੱਚ ਆਨਲਾਈਨ ਬੈਂਕਿੰਗ, ਯੂ.ਪੀ.ਆਈ. ਅਤੇ ਮੋਬਾਈਲ ਐਪਸ ਦੀ ਵਰਤੋਂ ਵਧਣ ਦੇ ਨਾਲ-ਨਾਲ ਸਾਈਬਰ ਅਪਰਾਧੀ ਵੀ ਨਵੇਂ-ਨਵੇਂ ਤਰੀਕਿਆਂ ਨਾਲ ਲੋਕਾਂ ਨੂੰ ਆਪਣਾ ਸ਼ਿਕਾਰ ਬਣਾ ਰਹੇ ਹਨ। ਇਸ ਸਬੰਧੀ “ਅਜੀਤ” ਨਾਲ ਜਾਣਕਾਰੀ ਸਾਂਝੀ ਕਰਦਿਆਂ ਸਾਇਬਰ ਅਪਰਾਧ ਮਾਮਲਿਆਂ ਦੇ ਮਾਹਿਰ ਐਡਵੋਕੇਟ ਸੰਜੀਵ ਗੋਇਲ ਨੇ ਦੱਸਿਆ ਕਿ ਕੁਝ ਦਿਨ ਪਹਿਲਾਂ ਸੰਗਰੂਰ ਦਾ ਇੱਕ ਵਸਨੀਕ ਆਪਣੀ ਗੱਡੀ ਰਾਹੀਂ ਚੰਡੀਗੜ੍ਹ ਗਿਆ ਸੀ ਤਾਂ ਉਸਨੂੰ ਮੋਬਾਈਲ ’ਤੇ ਲਿੰਕ ਆ ਗਿਆ ਕਿ ਤੁਹਾਡਾ ਟਰੈਫਿਕ ਨਿਯਮਾਂ ਦੀ ਉਲੰਘਣਾ ਦੇ ਕਾਰਨ ਚਲਾਨ ਕੱਟ ਗਿਆ ਹੈ, ਜਦੋਂ ਉਸਨੇ ਲਿੰਕ ਨੂੰ ਖੋਲਿਆ ਤਾਂ ਉਸ ਨੂੰ ਇਕ ਰੁਪਇਆ ਪੇਅ ਕਰਨ ਲਈ ਕਿਹਾ ਗਿਆ, ਸ਼ੱਕ ਹੋਣ ’ਤੇ ਉਸ ਨੇ ਤੁਰੰਤ ਲਿੰਕ ਡਿਲੀਟ ਕਰ ਦਿੱਤਾ ਕਿਉਂਕਿ ਉਹ ਲਿੰਕ ਨੂੰ ਕਲਿੱਕ ਕਰ ਚੁੱਕਾ ਸੀ, ਇਸ ਕਾਰਨ ਸਾਇਬਰ ਠੱਗਾਂ ਨੇ ਉਸ ਦਾ ਮੋਬਾਈਲ ਹੈਕ ਕਰ ਲਿਆ ਅਤੇ ਯੂ.ਪੀ.ਆਈ. ਕੋਡ ਵੀ ਬਦਲ ਲਿਆ, ਜਿਸ ਨਾਲ ਉਸ ਦੇ ਤਿੰਨ ਬੈਂਕ ਖਾਤਿਆਂ ਵਿੱਚੋਂ ਕਰੀਬ 13.50 ਲੱਖ ਰੁਪਇਆ ਸਾਫ ਹੋ ਗਿਆ। ਇਸੇ ਤਰ੍ਹਾਂ ਧੂਰੀ ਦੇ ਇਕ ਹੋਰ ਵਸਨੀਕ ਨੇ ਇੱਕ ਡਾਕਟਰ ਤੋਂ ਅਪੋਆਇੰਟਮੈਂਟ ਲੈਣ ਲਈ ਉਸ ਦਾ ਨੰਬਰ ਨੈੱਟ ਤੋਂ ਲੱਭਿਆ ਅਤੇ ਉੱਥੇ ਦੱਸੀ ਫੀਸ ਜਮ੍ਹਾਂ ਕਰਵਾ ਬੈਠਾ, ਬਸ ਫਿਰ ਕੀ ਸੀ ਉਸ ਦੇ ਖਾਤੇ ’ਚੋਂ ਦੋ ਲੱਖ ਰੁਪਏ ਨਿਕਲ ਗਏ ਕਿਉਂਕਿ ਉਹ ਨੈਟ ਤੋਂ ਲੱਭਿਆ ਡਾਕਟਰ ਦਾ ਨੰਬਰ ਫਰਜੀ ਸੀ। ਐਡਵੋਕੇਟ ਸੰਜੀਵ ਗੋਇਲ ਨੇ ਦੱਸਿਆ ਕਿ ਦੋਨਾਂ ਮਾਮਲਿਆਂ ਵਿੱਚ ਜ਼ਿਲ੍ਹਾ ਪੁਲਿਸ ਸਾਇਬਰ ਸੈਲ ਵਿਖੇ ਮਾਮਲੇ ਦਰਜ ਹੋ ਚੁੱਕੇ ਹਨ। ਕੀਤੀ ਜਾ ਰਹੀ ਕਾਰਵਾਈ ਦੌਰਾਨ ਇੱਕ ਮਾਮਲੇ ਵਿੱਚ 4.50 ਲੱਖ ਰੁਪਏ ਅਤੇ ਦੂਜੇ ਮਾਮਲੇ ਵਿੱਚ 2.0 ਲੱਖ ਰੁਪਏ ਫਰੀਜ ਕੀਤਾ ਜਾ ਚੁੱਕਾ ਹੈ। ਸ੍ਰੀ ਸੰਜੀਵ ਗੋਇਲ ਨੇ ਦੱਸਿਆ ਕਿ ਅਣਜਾਣ ਫਾਈਲਾਂ ਕਦੇ ਵੀ ਨਾ ਖੋਲ੍ਹੋ। ਜੇਕਰ ਸਾਈਬਰ ਠੱਗੀ ਹੋ ਜਾਵੇ ਤਾਂ ਤੁਰੰਤ ਰਾਸ਼ਟਰੀ ਸਾਈਬਰ ਕ੍ਰਾਈਮ ਹੈਲਪਲਾਈਨ 1930 ’ਤੇ ਕਾਲ ਕਰੋ ।
