ਭੋਜੇਮਾਜਰਾ ਦੇ ਪੁਲ ਦੀ ਟੁੱਟੀ ਹੋਈ ਰੇਲਿੰਗ ਅਤੇ ਮੁੱਖ ਮਾਰਗ ਤੋਂ ਨੀਵਾਂ ਹੋਣ ਕਾਰਨ ਕਦੇ ਵੀ ਵਾਪਰ ਸਕਦੈ ਹਾਦਸਾ

ਸ੍ਰੀ ਚਮਕੌਰ ਸਾਹਿਬ, 27 ਸਤੰਬਰ (ਜਗਮੋਹਣ ਸਿੰਘ ਨਾਰੰਗ)- ਨਜ਼ਦੀਕੀ ਪਿੰਡ ਭੋਜੇਮਾਜਰੇ ਵਿਖੇ ਸਰਹਿੰਦ ਨਹਿਰ ਦਾ ਮੁੱਖ ਮਾਰਗ ਤੋਂ ਕਾਫ਼ੀ ਨੀਵਾਂ ਬਣਿਆ ਪੁਲ ਅਤੇ ਪੁਲ ਦੀ ਟੁੱਟੀ ਰੇਲਿੰਗ ਕਾਰਨ ਕਦੇ ਵੀ ਅਣਹੋਣੀ ਘਟਨਾ ਵਾਪਰ ਸਕਦੀ ਹੈ। ਸ੍ਰੀ ਚਮਕੌਰ ਸਾਹਿਬ ਤੋਂ ਰੂਪਨਗਰ ਮੁੱਖ ਮਾਰਗ ਜੋ 2014 ਵਿਚ ਉੱਚਾ ਕਰਕੇ ਚੌੜਾ ਤੇ ਨਵਾਂ ਬਣਾਇਆ ਗਿਆ ਸੀ, ਜਿਸ ਕਾਰਨ ਭੋਜੇਮਾਜਰਾ ਦਾ ਨਹਿਰ ਵਾਲਾ ਪੁਲ ਕਰੀਬ ਡੇਢ ਫੁੱਟ ਨੀਵਾਂ ਰਹਿ ਗਿਆ ਸੀ, ਜਿਸ ਕਾਰਨ ਗੰਨੇ ਦੀ ਭਰੀ ਟਰਾਲੀ ਟਰੈਕਟਰ ਇੱਥੋਂ ਲੰਘਣੀ ਔਖੀ ਸੀ ਕਿਉਂਕਿ ਪੁਲ ਨੀਵਾਂ ਹੋਣ ਕਾਰਨ ਮੁੱਖ ਸੜਕ ’ਤੇ ਚੜ੍ਹਨ ਲੱਗਿਆ ਟਰੈਕਟਰ ਟਰਾਲੀ ਪਿੱਛੇ ਵੱਲ ਮੁੜ ਜਾਂਦੇ ਸਨ ਤੇ ਹਮੇਸ਼ਾ ਅਣਹੋਣੀ ਵਾਪਰਨ ਦਾ ਡਰ ਬਣਿਆ ਰਹਿੰਦਾ ਸੀ ,ਜਿਸ ਕਾਰਨ ਭਾਰੀ ਵਾਹਨ ਇੱਥੋਂ ਲੰਘਣ ਦੀ ਬਜਾਏ 10-12 ਕਿੱਲੋਮੀਟਰ ਲੰਮਾ ਪੈਡਾਂ ਤੈਅ ਕਰਕੇ ਆਪਣੀ ਮੰਜ਼ਿਲ ਵੱਲ ਅੱਗੇ ਵਧਦੇ ਸਨ, ਇਸ ਪੁਲ ਨੂੰ ਉੱਚਾ ਚੁੱਕਣ ਲਈ ਸਬੰਧਿਤ ਪਿੰਡਾਂ ਵਾਲੇ ਪਿਛਲੇ 10-12 ਸਾਲਾਂ ਤੋਂ ਸਰਕਾਰਾਂ ਨੂੰ ਗੁਹਾਰ ਲਗਾਉਂਦੇ ਆ ਰਹੇ ਹਨ,ਪਰ ਕੋਈ ਸੁਣਵਾਈ ਨਹੀਂ ਹੋਈ।