ਐੱਸ. ਏ. ਐੱਸ. ਨਗਰ, 22 ਜਨਵਰੀ (ਕਪਿਲ ਵਧਵਾ)-ਮੁਹਾਲੀ ਦੇ ਥਾਣਾ ਫੇਜ਼-11 ਦੀ ਪੁਲਿਸ ਨੇ ਦੋ-ਪਹੀਆ ਵਾਹਨ ਚੋਰੀ ਕਰਨ ਦੇ ਮਾਮਲੇ ਵਿਚ ਚੋਰੀ ਦੇ ਵਾਹਨ ਤੋੜ ਕੇ ਪੁਰਜ਼ੇ ਅੱਗੇ ਵੇਚਣ ਵਾਲੇ ਮੁੱਖ ਕਬਾੜੀਏ ਸੁਰੇਸ਼ ਕੁਮਾਰ, ਜੋ ਕਿ ਪਹਿਲਾਂ ਫ਼ਰਾਰ ਸੀ, ਨੂੰ ਬੁੱਧਵਾਰ ਦੇਰ ਰਾਤ ਗਿ੍ਫ਼ਤਾਰ ਕਰ ਲਿਆ | ਪੁਲਿਸ ਵਲੋਂ ਅੱਜ ਇਸ ਮੁਲਜ਼ਮ ਨੂੰ ਅਦਾਲਤ ਵਿਚ ਪੇਸ਼ ਕਰਕੇ ਪੁਲਿਸ ਰਿਮਾਂਡ ਹਾਸਿਲ ਕੀਤਾ ਗਿਆ ਹੈ | ਇਸ ਮਾਮਲੇ 'ਚ ਪੁਲਿਸ ਵਲੋਂ ਪਹਿਲਾਂ ਗਿ੍ਫ਼ਤਾਰ ਕੀਤੇ ਗਏ ਚੋਰਾਂ ਦੀ ਪਛਾਣ ਪਿ੍ੰਸ ਕੁਮਾਰ ਮੂਲ ਵਾਸੀ ਹਰਿਆਣਾ ਤੇ ਹਾਲ ਵਾਸੀ ਪਿੰਡ ਬੜਮਾਜਰਾ ਅਤੇ ਸਾਹਿਲ ਮੂਲ ਵਾਸੀ ਜ਼ਿਲ੍ਹਾ ਸ਼ਾਮਲੀ (ਉੱਤਰ ਪ੍ਰਦੇਸ਼) ਤੇ ਹਾਲ ਵਾਸੀ ਪਿੰਡ ਕੁੰਭੜਾ ਵਜੋਂ ਹੋਈ ਸੀ | ਇਸ ਤੋਂ ਇਲਾਵਾ ਇਨ੍ਹਾਂ ਮੁਲਜ਼ਮਾਂ ਦੀ ਨਿਸ਼ਾਨਦੇਹੀ 'ਤੇ ਚੋਰੀ ਦੇ ਵਾਹਨ ਖ਼ਰੀਦਣ ਵਾਲੇ ਪਿੰਡ ਕੁੰਭੜਾ ਦੇ ਰਹਿਣ ਵਾਲੇ ਦੋ ਕਬਾੜੀਆਂ ਤੁਲਸੀ ਤੇ ਵਿਸ਼ਾਲ ਨੂੰ ਵੀ ਪੁਲਿਸ ਵਲੋਂ ਕਾਬੂ ਕੀਤਾ ਜਾ ਚੁੱਕਾ ਹੈ | ਵਿਸ਼ਾਲ ਦੀ ਪੁੱਛਗਿੱਛ ਦੌਰਾਨ ਸਾਹਮਣੇ ਆਇਆ ਸੀ ਕਿ ਉਹ ਚੋਰੀ ਦੇ ਵਾਹਨਾਂ ਨੂੰ ਅੱਗੇ ਸੁਰੇਸ਼ ਕੁਮਾਰ ਨੂੰ ਵੇਚਦਾ ਸੀ, ਜੋ ਕਿ ਵਾਹਨਾਂ ਦੇ ਪੁਰਜ਼ੇ ਖੋਲ੍ਹ ਕੇ ਵੱਖ-ਵੱਖ ਥਾਵਾਂ 'ਤੇ ਵੇਚਦਾ ਸੀ | ਪੁਲਿਸ ਅਨੁਸਾਰ ਸੁਰੇਸ਼ ਕੁਮਾਰ ਦੀ ਗਿ੍ਫ਼ਤਾਰੀ ਨਾਲ ਗਰੋਹ ਦੇ ਹੋਰਨਾਂ ਲਿੰਕਾਂ ਬਾਰੇ ਵੀ ਮਹੱਤਵਪੂਰਨ ਜਾਣਕਾਰੀ ਮਿਲਣ ਦੀ ਆਸ ਹੈ ਤੇ ਹੋਰ ਗਿ੍ਫ਼ਤਾਰੀਆਂ ਹੋਣ ਤੋਂ ਵੀ ਇਨਕਾਰ ਨਹੀਂ ਕੀਤਾ ਜਾ ਸਕਦਾ |
