ਕੁਲਵੰਤ ਸਿੰਘ ਸੱਪਲ
ਡਾਬਾ/ਲੁਹਾਰਾ, 3 ਅਕਤੂਬਰ-ਵਿਧਾਨ ਸਭਾ ਹਲਕਾ ਦੱਖਣੀ ਅਧੀਨ ਆਉਂਦੀ ਸਥਾਨਕ ਵਾਰਡ ਨੰਬਰ 37 ਦੀ ਬਰੋਟਾ ਰੋਡ ਨਹਿਰ ਤੋਂ ਜੈਡ ਮੋੜ ਤੱਕ, ਵਾਰਡ ਨੰਬਰ 38 ਪਿੰਡ ਲੁਹਾਰਾ ਦੀ ਫਿਰਨੀ, ਸਟਾਰ ਰੋਡ ਤੋਂ ਲੁਹਾਰਾ ਤੱਕ ਨਹਿਰ ਕਿਨਾਰੇ ਬਣੀ ਸੜਕ, ਵਾਰਡ ਨੰਬਰ 35 ਪਿੰਡ ਡਾਬਾ ਦੀ ਫਿਰਨੀ ਵਾਲੀ ਸੜਕ ਅਤੇ ਇੰਡਸਟਰੀ ਏਰੀਆ ਸੀ ਅਧੀਨ ਆਉਂਦੀਆਂ ਸੜਕਾਂ ਪਿਛਲੇ ਲੰਬੇ ਸਮੇਂ ਤੋਂ ਨਾ ਬਣੀਆਂ ਹੋਣ ਕਾਰਨ ਖਸਤਾ ਹਾਲ ਵਿਚ ਪਹੁੰਚ ਚੁੱਕੀਆਂ ਹਨ। ਬਰੋਟਾ ਰੋਡ ਸ਼ਿਮਲਾਪੁਰੀ ਨਿਵਾਸੀਆਂ ਨੇ ਦੱਸਿਆ ਕਿ ਆਮ ਆਦਮੀ ਪਾਰਟੀ ਦੀ ਸਰਕਾਰ ਦੇ ਕਾਰਜਕਾਲ ਦੌਰਾਨ ਉਕਤ ਸੜਕ ਦਾ ਨਵੇਂ ਸਿਰੇ ਤੋਂ ਨਿਰਮਾਣ ਤਾਂ ਕੀ ਹੋਣਾ ਸੀ ਬਲਕਿ ਇਸ ਸੜਕ ਨੂੰ ਰਿਪੇਅਰ ਵੀ ਨਹੀਂ ਕੀਤਾ ਗਿਆ ਹੈ। ਉਕਤ ਸੜਕਾਂ ਵਿਚ ਕਈ ਜਗ੍ਹਾ ਵੱਡੇ ਵੱਡੇ ਖੱਡੇ ਬਣੇ ਹੋਣ ਕਾਰਨ ਦੋ ਪਹੀਆ ਵਾਹਨ ਚਾਲਕਾਂ ਦਾ ਡਿਗਣਾ ਆਮ ਗੱਲ ਹੋ ਚੁੱਕੀ ਹੈ ਅਤੇ ਇਲਾਕੇ ਦੇ ਚੁਣੇ ਹੋਏ ਨੁਮਾਇੰਦੇ ਉਕਤ ਸੜਕਾਂ ਤੋਂ ਦਿਨ ਵਿਚ ਕਈ ਵਾਰ ਲੰਘਦੇ ਹਨ, ਪਰ ਉਨ੍ਹਾਂ ਨੂੰ ਸੜਕ ਵਿਚ ਬਣੇ ਹੋਏ ਟੋਏ ਪਤਾ ਨਹੀਂ ਦਿਖਾਈ ਨਹੀਂ ਦਿੰਦੇ ਹਨ ਜਾਂ ਉਕਤ ਨੁਮਾਇੰਦੇ ਇਲਾਕੇ ਦੀਆਂ ਸਮੱਸਿਆਵਾਂ ਨੂੰ ਹੱਲ ਹੀ ਨਹੀਂ ਕਰਨਾ ਚਾਹੁੰਦੇ। ਇਲਾਕਾ ਨਿਵਾਸੀਆਂ ਨੇ ਨਗਰ ਨਿਗਮ ਪ੍ਰਸ਼ਾਸਨ ਅਤੇ ਸੂਬਾ ਸਰਕਾਰ ਤੋਂ ਮੰਗ ਕੀਤੀ ਹੈ ਕਿ ਉਕਤ ਸੜਕਾਂ ਨੂੰ ਬਿਨਾਂ ਕਿਸੇ ਦੇਰੀ ਦੇ ਤੁਰੰਤ ਨਵੇਂ ਸਿਰੇ ਤੋਂ ਬਣਾਇਆ ਜਾਵੇ ਤਾਂ ਜੋ ਇਲਾਕਾ ਨਿਵਾਸੀਆਂ ਦੀਆਂ ਪਰੇਸ਼ਾਨੀਆਂ ਘੱਟ ਹੋ ਸਕਣ।
