ਸਰਵਿਸ ਰੋਡ ‘ਤੇ ਦੌੜ ਲਗਾ ਰਹੇ ਨੌਜਵਾਨ ਨੂੰ ਅਣਪਛਾਤੇ ਵਾਹਨ ਨੇ ਮਾਰੀ ਟੱਕਰ, ਮੌਤ

ਕਾਠਗੜ੍ਹ, 17 ਸਤੰਬਰ (ਹਰਸਿਮਰਨ ਜੋਤ ਸਿੰਘ ਕਲੇਰ)-ਰੋਪੜ-ਬਲਾਚੌਰ ਹਾਈਵੇ ‘ਤੇ ਸਥਿਤ ਪਿੰਡ ਰੈਲ ਮਾਜਰਾ ਤੋਂ ਬਹੁਤ ਹੀ ਦੁਖਦਾਈ ਖ਼ਬਰ ਸਾਹਮਣੇ ਆਈ ਹੈ, ਜਿਥੇ ਫੌਜ ‘ਚ ਭਰਤੀ ਹੋਣ ਦਾ ਸੁਪਨਾ ਲੈ ਕੇ ਤਿਆਰੀ ਕਰ ਰਹੇ ਇਕ 19 ਸਾਲਾਂ ਹੋਣਹਾਰ ਨੌਜਵਾਨ ਦੀ ਸਵੇਰੇ ਸਰਵਿਸ ਰੋਡ ‘ਤੇ ਦੌੜ ਲਗਾਉਂਦੇ ਸਮੇਂ ਅਣਪਛਾਤੇ ਵਾਹਨ ਵਲੋਂ ਟੱਕਰ ਮਾਰਨ ਕਾਰਨ ਮੌਕੇ ‘ਤੇ ਹੀ ਦਰਦਨਾਕ ਮੌਤ ਹੋ ਗਈ। ਜਾਣਕਾਰੀ ਅਨੁਸਾਰ ਪਿੰਡ ਰੈਲ ਮਾਜਰਾ ਦਾ 19 ਸਾਲਾ ਨੌਜਵਾਨ ਲਵਪ੍ਰੀਤ ਸਿੰਘ ਪੁੱਤਰ ਜਸਬੀਰ ਸਿੰਘ ਜੋ ਕਿ ਫੌਜ ‘ਚ ਭਰਤੀ ਹੋਣ ਲਈ ਦਿਨ-ਰਾਤ ਮਿਹਨਤ ਕਰ ਰਿਹਾ ਸੀ ਅਤੇ ਜਿਸ ਦਾ ਲਿਖਤੀ ਟੈਸਟ ਪਾਸ ਹੋ ਚੁੱਕਾ ਸੀ ਅਤੇ 16 ਨਵੰਬਰ ਨੂੰ ਜਲੰਧਰ ਵਿਖੇ ਉਸ ਦਾ ਫਿਜ਼ੀਕਲ ਟੈਸਟ ਹੋਣਾ ਸੀ, ਅੱਜ ਸਵੇਰੇ ਕਰੀਬ 5:30 ਵਜੇ ਰੋਜ਼ਾਨਾ ਵਾਂਗ ਰੈਲ ਮਾਜਰਾ ਤੋਂ ਰਾਇਤ ਕਾਲਜ ਵਾਲੀ ਸਰਵਿਸ ਰੋਡ ‘ਤੇ ਦੌੜ ਲਗਾ ਰਿਹਾ ਸੀ।