ਪਠਾਨਕੋਟ, 21 ਸਤੰਬਰ (ਵਿਨੋਦ)-ਪਿਛਲੇ ਹਫ਼ਤੇ ਦੌਰਾਨ ਪਠਾਨਕੋਟ ਵਿਧਾਨ ਸਭਾ, ਹਲਕਾ ਭੋਆ ਵਿਧਾਨ ਸਭਾ ਹਲਕਾ ਤੇ ਸੁਜਾਨਪੁਰ ਵਿਧਾਨ ਸਭਾ ਹਲਕਾ 'ਚ ਇੰਡੀਅਨ ਨੈਸ਼ਨਲ ਕਾਂਗਰਸ ਦੇ ਬੈਨਰ ਹੇਠ ਸਰਗਰਮੀਆਂ ਦਾ ਦੌਰ ਚੱਲ ਰਿਹਾ ਹੈ | ਜਿੱਥੇ ਮੁੱਖ ਉਦੇਸ਼ ਪਠਾਨਕੋਟ ਜ਼ਿਲ੍ਹੇ ਲਈ ਇਕ ਨਵਾਂ ਜ਼ਿਲ੍ਹਾ ਪ੍ਰਧਾਨ ਲੱਭਣਾ ਸੀ, ਉੱਥੇ ਹੀ ਕਾਂਗਰਸ ਹਾਈਕਮਾਂਡ ਪਠਾਨਕੋਟ ਜ਼ਿਲ੍ਹੇ ਦੇ ਹਰ ਪਿੰਡ ਤੇ ਕਸਬੇ ਦੇ ਲੋਕਾਂ ਦੀਆਂ ਬੁਨਿਆਦੀ ਇੱਛਾਵਾਂ ਨੂੰ ਸਮਝਣਾ ਵੀ ਚਾਹੁੰਦੀ ਸੀ | ਇਸ ਉਦੇਸ਼ ਲਈ ਕਾਂਗਰਸ ਹਾਈਕਮਾਂਡ ਨੇ ਇਕ ਉੱਚ-ਪੱਧਰੀ ਕਮੇਟੀ ਭੇਜੀ, ਜਿਸ 'ਚ ਏ.ਆਈ.ਸੀ.ਸੀ. ਸਕੱਤਰ ਰਾਮ ਕਿਸ਼ਨ ਓਝਾ, ਡਿਪਟੀ ਸੀ.ਐਲ.ਪੀ. ਲੀਡਰ ਅਰੁਣਾ ਚੌਧਰੀ ਤੇ ਸੀਨੀਅਰ ਕਾਂਗਰਸੀ ਆਗੂ ਵਰਿੰਦਰ ਸਿੰਘ ਸ਼ਾਮਿਲ ਸਨ | ਜਿੱਥੇ ਹਜ਼ਾਰਾਂ ਜਨਤਕ ਪ੍ਰਤੀਨਿਧੀਆਂ ਨੇ ਓਝਾ ਨੂੰ ਆਪਣੇ ਵਿਚਾਰ ਪੇਸ਼ ਕੀਤੇ, ਉੱਥੇ ਹੀ ਲਗਭਗ 40 ਆਗੂਆਂ ਨੇ ਇਸ ਅਹੁਦੇ ਲਈ ਲਿਖਤੀ ਦਾਅਵੇ ਪੇਸ਼ ਕੀਤੇ | ਇੰਨ੍ਹਾ ਹੀ ਨਹੀਂ, ਇਨ੍ਹਾਂ ਦਾਅਵੇਦਾਰਾਂ ਨੇ ਇਕ-ਇਕ ਇੰਟਰਵਿਊ ਦੇ ਕੇ ਕਾਂਗਰਸ ਸੰਗਠਨ ਨੂੰ ਘਰ-ਘਰ ਮਜ਼ਬੂਤ ਕਰਨ, ਫੈਲਾਉਣ ਤੇ ਪਹੁੰਚਣ ਲਈ ਰਣਨੀਤੀਆਂ ਵੀ ਪੇਸ਼ ਕੀਤੀਆਂ | ਕਾਂਗਰਸੀ ਵਰਕਰਾਂ ਤੇ ਆਗੂਆਂ ਦੀ ਸਰਗਰਮੀ ਬੇਮਿਸਾਲ ਸੀ | ਰਾਮ ਕਿਸ਼ਨ ਓਝਾ ਅਨੁਸਾਰ ਇੰਡੀਅਨ ਨੈਸ਼ਨਲ ਕਾਨਫ਼ਰੰਸ ਸੰਗਠਨ ਦੇ ਇਤਿਹਾਸ ਤੇ ਮਾਣ ਨੂੰ ਧਿਆਨ ਵਿਚ ਰੱਖਦੇ ਹੋਏ ਉਨ੍ਹਾਂ ਨੇ ਇਕ ਵਿਸਥਾਰਤ ਰਿਪੋਰਟ ਤਿਆਰ ਕੀਤੀ ਹੈ ਜੋ ਪਾਰਟੀ ਹਾਈਕਮਾਂਡ ਦੇ ਸਾਹਮਣੇ ਪੇਸ਼ ਕੀਤੀ ਜਾਵੇਗੀ | ਪਾਰਟੀ ਇੰਚਾਰਜਾਂ ਵਲੋਂ ਕਾਂਗਰਸ ਦੇ ਨਵੇਂ ਜ਼ਿਲ੍ਹਾ ਪ੍ਰਧਾਨ ਦੀ ਭਾਲ ਲਈ ਇੰਟਰਵਿਊ ਪ੍ਰਕਿਰਿਆ ਪੂਰੀ ਕੀਤੀ ਗਈ | ਆਉਣ ਵਾਲੇ ਦਿਨਾਂ 'ਚ ਕਾਂਗਰਸ ਲੀਡਰਸ਼ਿਪ ਵਲੋਂ ਪਠਾਨਕੋਟ ਜ਼ਿਲ੍ਹਾ ਪ੍ਰਧਾਨ ਦੇ ਨਾਮ ਦਾ ਐਲਾਨ ਕੀਤੇ ਜਾਣ ਦੀ ਸੰਭਾਵਨਾ ਹੈ |
