ਦਸੂਹਾ, 20 ਸਤੰਬਰ (ਕੌਸ਼ਲ)-ਪੰਜਾਬ 'ਚ ਆਈ ਭਿਆਨਕ ਕੁਦਰਤੀ ਆਫ਼ਤ ਹੜ੍ਹ ਦੌਰਾਨ ਬਾਬਾ ਦੀਪ ਸਿੰਘ ਸੇਵਾ ਦਲ ਗੜ੍ਹਦੀਵਾਲਾ ਤੇ ਮਨਜੋਤ ਸਿੰਘ ਤਲਵੰਡੀ ਦੀ ਅਗਵਾਈ ਹੇਠ ਨੌਜਵਾਨਾਂ ਦੀ ਟੀਮ ਨੇ ਆਪਣੀ ਜਾਨ ਦੀ ਪ੍ਰਵਾਹ ਨਾ ਕਰਦੇ ਹੋਏ ਸੇਵਾ ਦਾ ਉਹ ਮਿਸਾਲ ਕਾਇਮ ਕੀਤਾ ਜੋ ਸਦਾ ਯਾਦ ਰਹੇਗਾ | ਪਿਛਲੇ 50 ਦਿਨਾਂ ਤੋਂ ਦਿਨ-ਰਾਤ ਹੜ੍ਹ ਪੀੜਤਾਂ ਦੀ ਸੇਵਾ ਕਰ ਰਹੀ ਇਸ ਟੀਮ ਦਾ ਵਿਧਾਇਕ ਐਡਵੋਕੇਟ ਕਰਮਬੀਰ ਸਿੰਘ ਘੁੰਮਣ ਦੀ ਟੀਮ ਵਲੋਂ ਅਤੇ ਚੇਅਰਮੈਨ ਮਾਰਕੀਟ ਕਮੇਟੀ ਦਸੂਹਾ ਕੰਵਲਪ੍ਰੀਤ ਸਿੰਘ ਸੰਧੂ, ਬਰਿੰਦਰ ਇਕਬਾਲ ਸਿੰਘ ਘੁੰਮਣ ਤੇ ਮੀਤ ਪ੍ਰਧਾਨ ਨਗਰ ਕੌਂਸਲ ਦਸੂਹਾ ਅਮਰਪ੍ਰੀਤ ਸਿੰਘ ਸੋਨੂੰ ਖ਼ਾਲਸਾ ਵਲੋਂ ਮਾਰਕੀਟ ਕਮੇਟੀ ਵਿਖੇ ਸ਼ਾਨਦਾਰ ਸਨਮਾਨ ਕੀਤਾ | ਸਮਾਗਮ 'ਚ ਹਰਵਿੰਦਰ ਕਾਹਲੋਂ, ਸੰਤੋਖ ਤੋਖੀ, ਵਿਰਦੀ, ਮੰਨੂ ਖੁੱਲਰ, ਅਮਿ੍ਤ ਵਾਲੀਆ, ਪਵਿੱਤਰ ਲਵਲੀ, ਰਾਜੂ ਠੁਕਰਾਲ, ਇੰਦਰਜੀਤ ਸਿੰਘ, ਲਵਲੀ ਕੱਲੋਵਾਲ ਸਮੇਤ ਕਈ ਆਗੂ ਮੌਜੂਦ ਰਹੇ | ਆਗੂਆਂ ਨੇ ਦੱਸਿਆ ਕਿ ਸੇਵਾ ਦਲ ਦੀ ਟੀਮ ਨੇ ਹੜ੍ਹ ਦੌਰਾਨ ਮੋਟਰ ਕਿਸ਼ਤੀਆਂ ਦੀ ਵਰਤੋਂ ਕਰਕੇ ਸੈਂਕੜਿਆਂ ਫਸੇ ਪਰਿਵਾਰਾਂ ਨੂੰ ਬਾਹਰ ਕੱਢਿਆ | ਰਾਹਤ ਸਮਗਰੀ, ਖਾਣ-ਪੀਣ ਦੀਆਂ ਚੀਜ਼ਾਂ, ਕੱਪੜੇ ਅਤੇ ਦਵਾਈਆਂ ਘਰ-ਘਰ ਪਹੁੰਚਾਈਆਂ ਗਈਆਂ | ਇਸ ਤੋਂ ਇਲਾਵਾ ਵੱਡੇ ਪੱਧਰ 'ਤੇ ਮੈਡੀਕਲ ਕੈਂਪ ਲਗਾ ਕੇ ਲੋਕਾਂ ਦੇ ਸਰੀਰਕ ਟੈੱਸਟ ਕੀਤੇ ਗਏ ਅਤੇ ਬਿਮਾਰਾਂ ਨੂੰ ਤੁਰੰਤ ਇਲਾਜ ਮੁਹੱਈਆ ਕਰਵਾਇਆ ਗਿਆ, ਹੁਣ ਸੇਵਾ ਦਲ ਆਪਣੇ ਦੂਜੇ ਚਰਨ ਵੱਲ ਵਧ ਰਿਹਾ ਹੈ | ਮਨਜੋਤ ਸਿੰਘ ਤਲਵੰਡੀ ਨੇ ਐਲਾਨ ਕੀਤਾ ਕਿ ਸੁਸਾਇਟੀ ਵਲੋਂ ਲਗਪਗ 2800 ਏਕੜ ਹੜ-ਪ੍ਰਭਾਵਿਤ ਜ਼ਮੀਨ 'ਤੇ ਕਿਸਾਨ ਵੀਰਾਂ ਲਈ ਫ਼ਸਲ ਬੀਜ ਕੇ ਦਿੱਤੀ ਜਾਵੇਗੀ | ਵਿਧਾਇਕ ਕਰਮਬੀਰ ਸਿੰਘ ਘੁੰਮਣ ਨੇ ਕਿਹਾ ਇਹ ਨੌਜਵਾਨ ਸਾਡੇ ਸਮਾਜ ਲਈ ਮਿਸਾਲ ਹਨ |
