ਪਟਨਾ, 4 ਨਵੰਬਰ (ਏਜੰਸੀ)-ਬਿਹਾਰ 'ਚ 6 ਨਵੰਬਰ ਨੂੰ ਹੋ ਰਹੀਆਂ ਪਹਿਲੇ ਪੜਾਅ ਦੀਆਂ ਵੋਟਾਂ ਲਈ ਚੋਣ ਪ੍ਰਚਾਰ ਮੰਗਲਵਾਰ ਸ਼ਾਮ 5 ਵਜੇ ਬੰਦ ਹੋ ਗਿਆ | ਸੂਬੇ ਦੇ ਜਿਨ੍ਹਾਂ 18 ਜ਼ਿਲਿ੍ਹਆਂ 'ਚ 6 ਨਵੰਬਰ ਨੂੰ ਵੋਟਾਂ ਪੈਣਗੀਆਂ, ਉਥੇ ਹੁਣ ਚੋਣ ਰੈਲੀਆਂ ਜਾਂ ਚੋਣ ਮੀਟਿੰਗਾਂ ਨਹੀਂ ਹੋਣਗੀਆਂ, ਉਮੀਦਵਾਰ ਕੇਵਲ ਘਰ-ਘਰ ਜਾ ਕੇ ਚੋਣ ਪ੍ਰਚਾਰ ਕਰਨਗੇ | ਪਹਿਲੇ ਪੜਾਅ ਤਹਿਤ ਦਰਭੰਗਾ, ਮੁਜ਼ੱਫਰਪੁਰ , ਵੈਸ਼ਾਲੀ, ਬੇਗੁਸਰਾਏ, ਨਾਲੰਦਾ, ਪਟਨਾ ਸਮੇਤ 18 ਜ਼ਿਲਿ੍ਹਆਂ ਦੀਆਂ 121 ਸੀਟਾਂ ਲਈ ਵੋਟਾਂ ਪੈਣਗੀਆਂ ਅਤੇ ਕੁੱਲ 1314 ਉਮੀਦਵਾਰ ਚੋਣ ਮੈਦਾਨ 'ਚ ਹਨ | ਚੋਣ ਪ੍ਰਚਾਰ ਦੇ ਆਖ਼ਰੀ ਦਿਨ ਵੱਖ-ਵੱਖ ਪਾਰਟੀਆਂ ਦੇ ਦਿੱਗਜ ਆਗੂਆਂ ਨੇ ਆਪਣੇ ਉਮੀਦਵਾਰਾਂ ਦੇ ਹੱਕ 'ਚ ਚੋਣ ਰੈਲੀਆਂ ਕੀਤੀਆਂ |
