ਏਸ਼ਿਆਈ ਅੰਡਰ-23 ਅਥਲੈਟਿਕਸ ਚੈਂਪੀਅਨਸ਼ਿਪ ਪਹਿਲੇ ਦਿਨ ਭਾਰਤ ਨੇ ਸੋਨ ਸਮੇਤ ਜਿੱਤੇ 5 ਤਗਮੇ

ਓਰਡੋਸ (ਚੀਨ), 9 ਜੁਲਾਈ (ਏਜੰਸੀ)-ਭਾਰਤ ਨੇ ਏਸ਼ਿਆਈ ਅੰਡਰ-23 ਅਥਲੈਟਿਕਸ ਚੈਂਪੀਅਨਸ਼ਿਪ ਦੇ ਪਹਿਲੇ ਦਿਨ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਇਕ ਸੋਨ, ਇਕ ਚਾਂਦੀ ਤੇ ਤਿੰਨ ਕਾਂਸੇ ਸਮੇਤ ਕੁਲ 5 ਤਗਮੇ ਆਪਣੇ ਨਾਂਅ ਕੀਤੇ। ਦਿਨ ਦੀ ਸਮਾਪਤੀ ਭਾਰਤ ਨੇ ਮਿਸ਼ਰਿਤ 4*400 ਮੀਟਰ ਰਿਲੇਅ ’ਚ ਸੋਨ ਤਗਮਾ ਜਿੱਤ ਕੇ ਕੀਤੀ। ਭਾਰਤੀ ਟੀਮ ਦੇ ਅਸਤਿਕ ਪ੍ਰਧਾਨ, ਸੈਂਡਰਾ ਮੋਲ ਸਾਬੂ, ਸੇਤੂ ਮਿਸ਼ਰਾ ਤੇ ਸਚਿਨ ਸਾਂਗਲੇ ਨੇ 3 ਮਿੰਟ 18.64 ਸੈਕੰਡ ਦਾ ਸਮਾਂ ਕੱਢਦੇ ਹੋਏ ਸੋਨ ਤਗਮੇ ’ਤੇ ਕਬਜ਼ਾ ਕੀਤਾ। ਇਸ ਤੋਂ ਇਲਾਵਾ ਸ਼ਿਵਾਜੀ ਪਰਸ਼ੂਰਾਮ ਨੇ 5000 ਮੀਟਰ ਦੌੜ ’ਚ ਚਾਂਦੀ ਦਾ ਤਗਮਾ, ਜਦੋਂ ਕਿ ਭਰਤਪ੍ਰੀਤ ਸਿੰਘ ਨੇ ਡਿਸਕਸ ਥਰੋਅ ’ਚ, ਵਿਨੋਦ ਸਿੰਘ ਨੇ 5000 ਮੀਟਰ ਦੌੜ ’ਚ, ਪ੍ਰਾਚੀ ਦੇਵਕਰ ਨੇ 3000 ਮੀਟਰ ਸਟੀਪਲਚੇਜ ’ਚ ਕਾਂਸੀ ਦੇ ਤਗਮੇ ਹਾਸਿਲ ਕੀਤੇ।