ਭਾਖੜਾ ਡੈਮ ਨੂੰ ਕੋਈ ਖ਼ਤਰਾ ਨਹੀਂ

ਅ

ਅਜੀਤ ਡੈਸਕ 11-09-2026

ਨੰਗਲ, 10 ਸਤੰਬਰ (ਗੁਰਪ੍ਰੀਤ ਸਿੰਘ ਗਰੇਵਾਲ)-ਭਾਖੜਾ ਬਿਆਸ ਪ੍ਰਬੰਧ ਬੋਰਡ ਦੇ ਸੂਤਰਾਂ ਨੇ ਅੱਜ ਇੱਥੇ ਸਪੱਸ਼ਟ ਤੇ ਸਾਫ਼ ਸ਼ਬਦਾਂ ’ਚ ਦੱਸਿਆ ਕਿ ਭਾਖੜਾ ਡੈਮ ਨੂੰ ਕੋਈ ਖ਼ਤਰਾ ਨਹੀਂ। ਪਾਣੀ ਦੇ ਦਬਾਅ ਕਾਰਨ ਭਾਖੜਾ ਡੈਮ ਦਾ ਮਾਮੂਲੀ ਝੁਕਣਾ /ਪਰਤਣਾ ਡੈਮ ਦਾ ਵਿਲੱਖਣ ਲੱਛਣ ਹੈ, ਕੋਈ ਖ਼ਤਰੇ ਵਾਲੀ ਗੱਲ ਨਹੀਂ । 740 ਫੁੱਟ ਉੱਚੇ ਭਾਖੜਾ ਡੈਮ ਦੀ ਉਮਰ 400 ਸਾਲ ਮਿੱਥੀ ਗਈ ਸੀ। ਗਲੋਬਲ ਵਾਰਮਿੰਗ/ਚੌਗਿਰਦਾ ਸੰਤੁਲਨ ਵਿਗਾੜ ਕਾਰਨ ਭਾਖੜਾ ਡੈਮ ਦੀ ਉਮਰ ਘਟੀ ਜਰੂਰ ਹੈ ਕਿਉਂਕਿ ਭਾਖੜਾ ਡੈਮ ਦੀ ਝੀਲ ‘ਗੋਬਿੰਦ ਸਾਗਰ’ ’ਚ ਨਿਰੰਤਰ ਸਿਲਟ ਆ ਰਹੀ ਹੈ । ਇਹ ਸਿਲਟ ਤਾਂ ਭਾਖੜਾ ਡੈਮ ਤੋਂ 10 ਕਿ.ਮੀ ਪਿੱਛੇ ਹੈ। ਬੀ.ਬੀ.ਐਮ.ਬੀ., ਆਈ.ਆਈ.ਟੀ. ਰੂਪਨਗਰ ਅਤੇ ਹੋਰ ਸਰਕਾਰੀ ਏਜੰਸੀਆਂ ਸਿਲਟ ਕੱਢਣ ਦੀ ਵੱਡੀ ਯੋਜਨਾ ’ਤੇ ਕੰਮ ਕਰ ਰਹੀਆਂ ਹਨ। 2027 ਦੇ ਅੰਤ ਤੱਕ ਸੀਰ ਖੱਡ, ਸ਼ੁਕਰ ਖੱਡ ਅਤੇ ਹੋਰਨਾਂ ਥਾਵਾਂ ਤੋਂ ਸਿਲਟ ਕੱਢਣ ਦਾ ਕੰਮ ਸ਼ੁਰੂ ਹੋ ਸਕਦਾ ਹੈ । ਚੇਅਰਮੈਨ ਮਨੋਜ ਤ੍ਰਿਪਾਠੀ ਅਤੇ ਭਾਖੜਾ ਡੈਮ ਦੇ ਚੀਫ ਇੰਜੀਨੀਅਰ ਸੀ.ਪੀ. ਸਿੰਘ ਜੰਗਲੀ ਜੀਵ ਸੁਰੱਖਿਆ ਵਿਭਾਗ ਤੋਂ ਪ੍ਰਵਾਨਗੀ ਲੈਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਤਾਂ ਕਿ ਅਗਲੇ ਵਰ੍ਹੇ ਅਪ੍ਰੈਲ, ਮਈ, ਜੂਨ ’ਚ ਸਿਲਟ ਕੱਢੀ ਜਾ ਸਕੇ।