ਬਿਨ੍ਹਾਂ ਅਖ਼ਤਿਆਰ ਬਿਲਟੀਆਂ ਚੈੱਕ ਕਰ ਕੇ ਕਥਿਤ ਨਾਜਾਇਜ਼ ਵਸੂਲੀ ਦੇ ਦੋਸ਼, ਪੁਲਿਸ ਨੂੰ ਸ਼ਿਕਾਇਤ
ਮੰਡੀ ਕਿੱਲਿਆਂਵਾਲੀ, 23 ਅਗਸਤ (ਇਕਬਾਲ ਸਿੰਘ ਸ਼ਾਂਤ)-ਇਸ ਸਰਹੱਦੀ ਕਸਬੇ ਵਿਚ ਪਿਆਜ਼ ਅਤੇ ਪਸ਼ੂਆਂ ਦੀ ਲੋਡਿੰਗ ਸਮੇਂ ਬਿਨਾਂ ਕਿਸੇ ਕਾਨੂੰਨੀ ਅਖਤਿਆਰ ਦੇ ਬਿਲਟੀਆਂ ਚੈੱਕ ਕਰਕੇ ਕਥਿਤ ਨਾਜਾਇਜ਼ ਵਸੂਲੀ ਦੇ ਦੋਸ਼ਾਂ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸਥਾਨਕ ਟਰਾਂਸਪੋਰਟਰ ਅਨਿਲ ਕੁਰੈਸ਼ੀ ਨੇ ਥਾਣਾ ਕਿੱਲਿਆਂਵਾਲੀ ਵਿਖੇ ਸ਼ਿਕਾਇਤ ਦਿੱਤੀ ਹੈ ਜਿਸ ’ਤੇ ਪੁਲਿਸ ਨੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ।
ਮੰਡੀ ਕਿੱਲਿਆਂਵਾਲੀ, 23 ਅਗਸਤ (ਇਕਬਾਲ ਸਿੰਘ ਸ਼ਾਂਤ)-ਇਸ ਸਰਹੱਦੀ ਕਸਬੇ ਵਿਚ ਪਿਆਜ਼ ਅਤੇ ਪਸ਼ੂਆਂ ਦੀ ਲੋਡਿੰਗ ਸਮੇਂ ਬਿਨਾਂ ਕਿਸੇ ਕਾਨੂੰਨੀ ਅਖਤਿਆਰ ਦੇ ਬਿਲਟੀਆਂ ਚੈੱਕ ਕਰਕੇ ਕਥਿਤ ਨਾਜਾਇਜ਼ ਵਸੂਲੀ ਦੇ ਦੋਸ਼ਾਂ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਸਥਾਨਕ ਟਰਾਂਸਪੋਰਟਰ ਅਨਿਲ ਕੁਰੈਸ਼ੀ ਨੇ ਥਾਣਾ ਕਿੱਲਿਆਂਵਾਲੀ ਵਿਖੇ ਸ਼ਿਕਾਇਤ ਦਿੱਤੀ ਹੈ ਜਿਸ ’ਤੇ ਪੁਲਿਸ ਨੇ ਪੜਤਾਲ ਸ਼ੁਰੂ ਕਰ ਦਿੱਤੀ ਹੈ। ਅਨਿਲ ਕੁਰੈਸ਼ੀ ਨੇ ਦੋਸ਼ ਲਗਾਇਆ ਕਿ ਹਰ ਐਤਵਾਰ ਨੂੰ ਪਸ਼ੂ ਲੋਡਿੰਗ ਮੌਕੇ ਪਸ਼ੂ ਮੰਡੀ ਦੇ ਬਾਹਰਲੇ ਪਾਸੇ ਸੜਕ ’ਤੇ ਉਸਦੀ ਟਰਾਂਸਪੋਰਟ ਰਾਹੀਂ ਵਪਾਰ ਕਰਨ ਵਾਲੇ ਮੁਨਸ਼ੀਆਂ ਤੇ ਡਰਾਈਵਰਾਂ ਨੂੰ ਤੰਗ-ਪ੍ਰੇਸ਼ਾਨ ਕੀਤਾ ਜਾਂਦਾ ਹੈ। ਉਨ੍ਹਾਂ ਕਿਹਾ ਕਿ ਵਾਜਬ ਬਿਲਟੀ ਕੱਟੀ ਹੋਣ ਦੇ ਬਾਵਜੂਦ ਕੁਝ ਵਿਅਕਤੀ ਬਿਨਾਂ ਕਿਸੇ ਸਰਕਾਰੀ ਅਖਤਿਆਰ ਤੋਂ ਬਿਲਟੀਆਂ ਚੈੱਕ ਕਰਦੇ ਹਨ, ਜਿਨ੍ਹਾਂ ਵਲੋਂ ਮਾਲ ਲਿਜਾਣ ਬਦਲੇ ਕਥਿਤ ਨਾਜਾਇਜ਼ ਰੁਪਿਆਂ ਦੀ ਮੰਗ ਕੀਤੀ ਜਾਂਦੀ ਹੈ। ਉਨ੍ਹਾਂ ਦੋਸ਼ ਲਗਾਇਆ ਕਿ ਪਿਆਜ਼ ਜਾਂ ਪਸ਼ੂਆਂ ਦੀਆਂ ਲੋਡਿੰਗ ਲਈ ਟਰਾਂਸਪੋਰਟ ਦੀਆਂ ਗੱਡੀਆਂ ਲੋਡ ਕਰਨ ਸਮੇਂ ਕੁਝ ਵਿਅਕਤੀ ਪੰਜਾਬ ਤੇ ਹਰਿਆਣਾ ਦੇ ਹੋਰ ਮਾੜੇ ਅਨਸਰਾਂ ਨਾਲ ਮਿਲੀਭੁਗਤ ਤਹਿਤ ਲੋਡਿਡ ਗੱਡੀਆਂ ਨੂੰ ਜ਼ਬਰੀ ਰੋਕ ਲੈਂਦੇ ਹਨ। ਕੁਰੈਸ਼ੀ ਮੁਤਾਬਕ ਟਰਾਂਸਪੋਰਟਰਾਂ ਤੇ ਵਪਾਰੀਆਂ ਨੂੰ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਸ਼ਿਕਾਇਤਕਰਤਾ ਨੇ ਪੁਲਿਸ ਤੋਂ ਮੰਗ ਕੀਤੀ ਹੈ ਕਿ ਐਤਵਾਰ ਨੂੰ ਮੌਕੇ ਦਾ ਜਾਇਜ਼ਾ ਲੈ ਕੇ ਕਥਿਤ ਜਬਰੀ ਵਸੂਲੀ ਵਾਲੇ ਅਨਸਰਾਂ ਖ਼ਿਲਾਫ਼ ਕਾਨੂੰਨੀ ਕਾਰਵਾਈ ਮੰਗੀ ਹੈ, ਤਾਂ ਜੋ ਟਰਾਂਸਪੋਰਟਰ ਨੂੰ ਸੁਰੱਖਿਅਤ ਮਾਹੌਲ ’ਚ ਆਪਣਾ ਰੁਜ਼ਗਾਰ ਕਰ ਸਕਣ। ਦੂਜੇ ਪਾਸੇ ਥਾਣਾ ਕਿੱਲਿਆਂਵਾਲੀ ਦੇ ਸਬ ਇੰਸਪੈਕਟਰ ਗੁਰਦੀਪ ਸਿੰਘ ਨੇ ਕਿਹਾ ਕਿ ਸ਼ਿਕਾਇਤ ਦੀ ਪੜਤਾਲ ਕੀਤੀ ਜਾ ਰਹੀ ਹੈ।
