ਬਲਾਚੌਰ ਦੀ ਧਰਤੀ ਦੇ 3 ਸਿਆਸੀ ਤੀਰ, ਨਿਸ਼ਾਨੇ ਵੱਖ-ਵੱਖ ਵਿਧਾਨ ਸਭਾ ਹਲਕੇ
ਜਾਡਲਾ, 12 ਨਵੰਬਰ (ਹਰਕੰਵਲ ਸਿੰਘ ਕੌਲਗੜ੍ਹ)-ਪੰਜਾਬ ਦੀ ਸਿਆਸਤ ’ਚ ਕਈ ਵਾਰ ਇਕ ਹਲਕੇ ਦੀ ਚਰਚਾ ਉਸ ਦੀਆਂ ਆਪਣੀਆਂ ਚੋਣ ਸਰਗਰਮੀਆਂ ਕਰਕੇ ਨਹੀਂ, ਸਗੋਂ ਉੱਥੋਂ ਨਿਕਲੇ ਸਿਆਸੀ ਚਿਹਰਿਆਂ ਕਰਕੇ ਦੂਜੇ ਹਲਕਿਆਂ ਤੱਕ ਪਹੁੰਚ ਜਾਂਦੀ ਹੈ। ਇਸ ਵਾਰ ਬਲਾਚੌਰ ਵਿਧਾਨ ਸਭਾ ਹਲਕਾ ਵੀ ਅਜਿਹੇ ਹੀ ਦਿਲਚਸਪ ਸਿਆਸੀ ਦ੍ਰਿਸ਼ ਕਾਰਨ ਚਰਚਾ ਵਿਚ ਹੈ।
ਜਾਡਲਾ, 12 ਨਵੰਬਰ (ਹਰਕੰਵਲ ਸਿੰਘ ਕੌਲਗੜ੍ਹ)-ਪੰਜਾਬ ਦੀ ਸਿਆਸਤ ’ਚ ਕਈ ਵਾਰ ਇਕ ਹਲਕੇ ਦੀ ਚਰਚਾ ਉਸ ਦੀਆਂ ਆਪਣੀਆਂ ਚੋਣ ਸਰਗਰਮੀਆਂ ਕਰਕੇ ਨਹੀਂ, ਸਗੋਂ ਉੱਥੋਂ ਨਿਕਲੇ ਸਿਆਸੀ ਚਿਹਰਿਆਂ ਕਰਕੇ ਦੂਜੇ ਹਲਕਿਆਂ ਤੱਕ ਪਹੁੰਚ ਜਾਂਦੀ ਹੈ। ਇਸ ਵਾਰ ਬਲਾਚੌਰ ਵਿਧਾਨ ਸਭਾ ਹਲਕਾ ਵੀ ਅਜਿਹੇ ਹੀ ਦਿਲਚਸਪ ਸਿਆਸੀ ਦ੍ਰਿਸ਼ ਕਾਰਨ ਚਰਚਾ ਵਿਚ ਹੈ। ਇੱਥੋਂ ਦੀ ਧਰਤੀ ਨਾਲ ਜੁੜੇ ਤਿੰਨ ਆਗੂ ਪੰਜਾਬ ਦੇ ਤਿੰਨ ਵੱਖ-ਵੱਖ ਵਿਧਾਨ ਸਭਾ ਹਲਕਿਆਂ ਤੋਂ ਇੱਕੋ ਪਾਰਟੀ ਦੇ ਉਮੀਦਵਾਰ ਵਜੋਂ ਚੋਣ ਮੈਦਾਨ ਵਿਚ ਨਿੱਤਰਨਗੇ। ਇਸ ਸਿਆਸੀ ਤਸਵੀਰ ਵਿਚ ਪਹਿਲਾ ਚਿਹਰਾ ਪੰਜਾਬ ਵਿਧਾਨ ਸਭਾ ਦੇ ਡਿਪਟੀ ਸਪੀਕਰ ਜੈ ਕਿਸ਼ਨ ਸਿੰਘ ਰੌੜੀ ਦਾ ਹੈ, ਜਿਨ੍ਹਾਂ ਦਾ ਪਿਛੋਕੜ ਪੋਜੇਵਾਲ ਨੇੜਲੇ ਪਿੰਡ ਰੌੜੀ ਨਾਲ ਜੁੜਿਆ ਹੈ, ਉਹ ਗੜ੍ਹਸ਼ੰਕਰ ਹਲਕੇ ਤੋਂ ਚੋਣ ਲੜਨਗੇ। ਦੂਜਾ ਚਿਹਰਾ ਬਲਾਚੌਰ ਦੀ ਮੌਜੂਦਾ ਵਿਧਾਇਕਾ ਸੰਤੋਸ਼ ਕਟਾਰੀਆ ਦਾ ਹੈ, ਜੋ ਪੋਜੇਵਾਲ ਨਾਲ ਸੰਬੰਧਤ ਹਨ ਅਤੇ ਆਪਣੇ ਹੀ ਹਲਕੇ ਤੋਂ ਮੁੜ ਚੋਣ ਮੈਦਾਨ ਵਿਚ ਉਤਰਨਗੇ। ਤੀਜਾ ਨਾਂਅ ਪਿੰਡ ਗੜ੍ਹੀ ਦੇ ਜਸਵੀਰ ਸਿੰਘ ਗੜ੍ਹੀ ਦਾ ਹੈ, ਜੋ ਪੰਜਾਬ ਅਨੁਸੂਚਿਤ ਜਾਤੀਆਂ ਕਮਿਸ਼ਨ ਦੇ ਸਾਬਕਾ ਚੇਅਰਮੈਨ ਰਹਿ ਚੁੱਕੇ ਹਨ ਅਤੇ ਚਮਕੌਰ ਸਾਹਿਬ ਹਲਕੇ ਤੋਂ ਚੋਣ ਲੜਨਗੇ। ਦਿਲਚਸਪ ਪਹਿਲੂ ਇਹ ਹੈ ਕਿ ਤਿੰਨਾਂ ਆਗੂਆਂ ਦੇ ਪਿੰਡਾਂ ਦੀ ਭੂਗੋਲਿਕ ਸਾਂਝ ਬਲਾਚੌਰ ਹਲਕੇ ਨਾਲ ਹੈ, ਪਰ ਸਿਆਸੀ ਮੈਦਾਨ ਤਿੰਨਾਂ ਦੇ ਵੱਖਰੇ ਹਨ। ਇਕ ਗੜ੍ਹਸ਼ੰਕਰ ਵਿਚ, ਦੂਜੀ ਬਲਾਚੌਰ ਵਿਚ ਤੇ ਤੀਜਾ ਚਮਕੌਰ ਸਾਹਿਬ ਵਿਚ ਵੋਟਰਾਂ ਦੀ ਕਚਹਿਰੀ ਵਿਚ ਆਪਣੀ ਸਿਆਸੀ ਪਰਖ ਕਰਵਾਏਗਾ। ਇਸ ਘਟਨਾਕ੍ਰਮ ਨੇ ਇਕ ਨਵੀਂ ਚਰਚਾ ਛੇੜ ਦਿੱਤੀ ਹੈ ਕੀ ਬਲਾਚੌਰ ਦੀ ਸਿਆਸੀ ਮਿੱਟੀ ’ਚੋਂ ਨਿਕਲੇ ਇਹ ਤਿੰਨੋਂ ਚਿਹਰੇ ਆਪਣੇ-ਆਪਣੇ ਹਲਕਿਆਂ ਵਿਚ ਜਿੱਤ ਦਾ ਇਤਿਹਾਸ ਸਿਰਜ ਸਕਣਗੇ। ਕੀ ਤਿੰਨਾਂ ਦੀ ਕਾਮਯਾਬੀ ਨਾਲ ਬਲਾਚੌਰ ਦਾ ਨਾਂਅ ਸੂਬੇ ਦੀ ਸਿਆਸਤ ਵਿਚ ਹੋਰ ਉੱਚਾ ਹੋਵੇਗਾ। ਫਿਲਹਾਲ ਤਿੰਨ ਹਲਕੇ, ਤਿੰਨ ਉਮੀਦਵਾਰ ਤੇ ਇਕੋ ਪਾਰਟੀ ਦਾ ਇਹ ਸਿਆਸੀ ਸਮੀਕਰਨ ਚੋਣਾਂ ਤੋਂ ਪਹਿਲਾਂ ਹੀ ਖਿੱਚ ਦਾ ਕੇਂਦਰ ਬਣ ਗਿਆ ਹੈ। ਪਰ ਸਿਆਸਤ ਵਿਚ ਪਿੰਡ ਦੀ ਪਛਾਣ ਤੇ ਪਾਰਟੀ ਦੀ ਟਿਕਟ ਨਾਲੋਂ ਵੱਡੀ ਪਰਖ ਵੋਟਰਾਂ ਦੀ ਮੋਹਰ ਹੁੰਦੀ ਹੈ। ਤਿੰਨਾਂ ਦੇ ਸਿਆਸੀ ਭਵਿੱਖ ਦਾ ਫ਼ੈਸਲਾ ਵੀ ਆਖ਼ਰਕਾਰ ਜਨਤਾ ਦੀ ਅਦਾਲਤ ਹੀ ਕਰੇਗੀ।
