ਭਾਰਤੀ ਮਹਿਲਾ ਹਾਕੀ ਟੀਮ ਨੇ 44 ਸਾਲਾਂ ਬਾਅਦ ਜਿੱਤਿਆ ਸੋਨ ਤਗਮਾ ਹਾਕੀ ’ਚ 1, ਮੁੱਕੇਬਾਜ਼ੀ ’ਚ 3, ਕੁਸ਼ਤੀ ’ਚ 1, ਤੀਰਅੰਦਾਜ਼ੀ ’ਚ 1 ਸੋਨ ਤਗਮਾ

ਕਾਕਾਮਿਗਾਹਾਰਾ (ਜਪਾਨ), 2 ਅਕਤੂਬਰ (ਪੀ. ਟੀ. ਆਈ.)-ਜਪਾਨ ਦੇ ਆਈਚੀ-ਨਾਗੋਆ ’ਚ ਚਲ ਰਹੀਆਂ 20ਵੀਆਂ ਏਸ਼ਿਆਈ ਖੇਡਾਂ ਦੌਰਾਨ ਸ਼ੁੱਕਰਵਾਰ ਨੂੰ ਭਾਰਤ ਨੇ 6 ਸੋਨ ਤਗਮੇ ਜਿੱਤੇ, ਜਿਸ ’ਚ ਹਾਕੀ ’ਚ ਇਕ, ਮੁੱਕੇਬਾਜ਼ੀ ’ਚ ਤਿੰਨ, ਕੁਸ਼ਤੀ ’ਚ ਇਕ ਅਤੇ ਤੀਰਅੰਦਾਜ਼ੀ ’ਚ ਇਕ ਸੋਨ ਤਗਮਾ ਸ਼ਾਮਿਲ ਹੈ। ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਮੌਜੂਦਾ ਚੈਂਪੀਅਨ ਚੀਨ ਨੂੰ 1-0 ਨਾਲ ਹਰਾ ਕੇ 44 ਸਾਲਾਂ ਬਾਅਦ ਆਪਣਾ ਪਹਿਲਾ ਏਸ਼ਿਆਈ ਖੇਡਾਂ ਦਾ ਸੋਨ ਤਗਮਾ ਜਿੱਤਿਆ। ਇਸ ਦੇ ਨਾਲ ਹੀ ਟੀਮ ਨੇ 2028 ਦੀਆਂ ਲਾਸ ਏਂਜਲਸ ਉਲੰਪਿਕ ਖੇਡਾਂ ਲਈ ਕੁਆਅੀਫਾਈ ਵੀ ਕਰ ਲਿਆ। ਲਾਲਰੇਮਸਿਆਮੀ ਨੇ 10ਵੇਂ ਮਿੰਟ ਵਿਚ ਸ਼ਾਨਦਾਰ ‘ਟੋਮਾਹਾਕ’ ਸ਼ਾਟ ਨਾਲ ਮੈਚ ਦਾ ਇਕਲੌਤਾ ਜੇਤੂ ਗੋਲ ਕੀਤਾ।ਭਾਰਤੀ ਟੀਮ ਦਾ ‘ਡਿਫੈਂਸ’ ਬਹੁਤ ਮਜ਼ਬੂਤ ਰਿਹਾ।ਉਸ ਨੇ ਚੀਨ ਦੇ ਲਗਾਤਾਰ ਹਮਲਿਆਂ ਨੂੰ ਨਾਕਾਮ ਬਣਾਇਆ, ਜਿਸ ਵਿਚ ਤਜਰਬੇਕਾਰ ਗੋਲਕੀਪਰ ਸਵਿਤਾ ਪੂਨੀਆ ਵਲੋਂ ਪੈਨਲਟੀ ਸਟ੍ਰੋਕ ਨੂੰ ਬਚਾਉਣਾ ਵੀ ਸ਼ਾਮਿਲ ਸੀ। ਇਸ ਜਿੱਤ ਦੇ ਨਾਲ ਹੀ ਭਾਰਤ ਨੇ ਏਸ਼ਿਆਈ ਖੇਡਾਂ ਵਿਚ ਆਪਣੇ ਦੂਜੇ ਸੋਨ ਤਗਮੇ ਲਈ 44 ਸਾਲਾਂ ਦੇ ਲੰਬੇ ਇੰਤਜ਼ਾਰ ਨੂੰ ਖਤਮ ਕੀਤਾ।ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਸਿਰਫ਼ ਇਕ ਵਾਰ 1982 ’ਚ ਸੋਨ ਤਗਮਾ ਜਿੱਤਿਆ ਸੀ।ਉਸ ਤੋਂ ਬਾਅਦ ਟੀਮ ਦੋ ਵਾਰ ਖ਼ਿਤਾਬ ਜਿੱਤਣ ਦੇ ਕਰੀਬ ਪਹੁੰਚੀ ਸੀ, ਜਿਥੇ ਉਸ ਨੂੰ ਦੱਖਣੀ ਕੋਰੀਆ ਅਤੇ ਜਪਾਨ ਤੋਂ ਹਾਰ ਦਾ ਸਾਹਮਣਾ ਕਰਨਾ ਪਿਆ ਸੀ। ਪੈਰਿਸ ਉਲੰਪਿਕ ਦੀ ਚਾਂਦੀ ਦਾ ਤਗਮਾ ਜੇਤੂ ਚੀਨ ਦੂਜੇ ਸਥਾਨ ‘ਤੇ ਰਿਹਾ, ਜਦਕਿ ਜਪਾਨ ਨੇ ਤੀਜੇ ਸਥਾਨ ਲਈ ਖੇਡੇ ਗਏ ਮੁਕਾਬਲੇ ਵਿਚ ਦੱਖਣੀ ਕੋਰੀਆ ਨੂੰ ਸ਼ੂਟ-ਆਊਟ ਵਿਚ 4-2 ਨਾਲ ਹਰਾ ਕੇ ਕਾਂਸੀ ਦਾ ਤਗਮਾ ਜਿੱਤਿਆ।