ਬਠਿੰਡਾ, 17 ਅਕਤੂਬਰ (ਅਵਤਾਰ ਸਿੰਘ ਕੈਂਥ)-ਸਥਾਨਕ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ (ਲੜਕੀਆਂ) ਮਾਲ ਰੋਡ ਵਿਖੇ ਵਾਤਾਵਰਣ ਸੰਬੰਧੀ ਜਾਗਰੂਕ ਸੈਮੀਨਾਰ ਪਿੰ੍ਰਸੀਪਲ ਕੁਲਵਿੰਦਰ ਸਿੰਘ ਦੀ ਦੇਖ ਰੇਖ ਹੇਠ ਕਰਵਾਇਆ ਗਿਆ | ਇਸ ਸੈਮੀਨਾਰ 'ਚ ਨੌਵੀਂ ਅਤੇ ਦਸਵੀਂ ਜਮਾਤ ਦੀਆਂ ਵਿਦਿਆਰਥਣਾਂ ਨੇ ਸਾਇੰਸ ਅਧਿਆਪਕਾਵਾਂ ਸਹਿਤ ਉਤਸ਼ਾਹ ਪੂਰਨ ਭਾਗ ਲਿਆ | ਮੁੱਖ ਮਹਿਮਾਨ ਅਸ਼ੋਕ ਮਿੱਤਲ ਨੇ ਵਾਤਾਵਰਣ ਦੇ ਪ੍ਰਦੂਸ਼ਿਤ ਹੋਣ ਪ੍ਰਤੀ ਘੱਟ ਕਰਨ ਦੀ ਲੋੜ ਸਬੰਧੀ ਉਪਾਵਾਂ ਬਾਰੇ ਚਰਚਾ ਕੀਤੀ | ਮੁੱਖ ਥੀਮ 'ਨਾ ਵਰਤੋਂ, ਘੱਟ ਵਰਤੋਂ, ਦੋਬਾਰਾ ਵਰਤੋਂ, ਮੁਰੰਮਤ ਕਰੋ ਅਤੇ ਪੁਨਰ ਚੱਕਰ' ਸੀ | ਇਸ ਸੈਮੀਨਾਰ 'ਚ ਵਿਦਿਆਰਥੀਆਂ ਦੀ ਮਦਦ ਨਾਲ ਧਰਤੀ,ਪਾਣੀ, ਬਿਜਲੀ, ਇੰਧਣ ਅਤੇ ਪਟਰੋਲ ਦੀ ਸੁਚੱਜੀ ਵਰਤੋਂ ਦੇ ਵੱਖ-ਵੱਖ ਢੰਗ ਤਰੀਕਿਆਂ 'ਤੇ ਚਾਨਣਾ ਪਾਇਆ | ਸ਼ੋਰ ਪ੍ਰਦੂਸ਼ਣ ਘੱਟ ਕਰਨ ਅਤੇ ਪੋਲੀਥੀਨ ਦੇ ਲਿਫਾਫੇ ਦੀ ਥਾਂ ਕੱਪੜੇ ਦਾ ਥੈਲਾ ਵਰਤਣ ਬਾਰੇ ਜੋਰ ਪਾਇਆ | ਪਾਣੀ ਦੀਆਂ ਖਾਲੀ ਬੋਤਲਾਂ ਦੀ ਮੁੜ ਵਰਤੋਂ ਦੇ ਕਈ ਉਪਾਅ ਦੱਸੇ | ਖਾਲੀ ਬੋਤਲ ਤੋਂ ਬਣਾਇਆ ਸਵੈ ਸੰਚਿਤ ਪੌਦਾ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਬਿੰਦੂ ਸੀ | ਉਨ੍ਹਾਂ ਦੱਸਿਆ ਕਿ ਬੋਤਲ ਤੋਂ ਤਿਆਰ ਕੀਤੇ ਗਮਲੇ ਦੇ ਪੌਦਿਆਂ ਨੂੰ ਮਹੀਨੇ 'ਚ ਸਿਰਫ਼ ਦੋ ਵਾਰ ਪਾਣੀ ਦੇਣ ਦੀ ਲੋੜ ਹੈ | ਛੱਤ 'ਤੇ ਰੱਖਣ ਨਾਲ ਸਲ੍ਹਾਬ ਨਹੀ ਆਉਂਦੀ | ਗੰਧਲੇ ਹੋ ਰਹੇ ਵਾਤਾਵਰਣ ਨੂੰ ਸ਼ੁੱਧ ਕਰਨ ਲਈ ਵਿਅਕਤੀਗਤ ਕੀਤੇ ਜਾ ਸਕਣ ਵਾਲੇ ਉਪਰਾਲਿਆਂ 'ਤੇ ਜੋਰ ਦਿੱਤਾ | ਇਸ ਮੌਕੇ ਜਸਪ੍ਰੀਤ ਕੌਰ, ਨਵਨੀਤ, ਅਮਨਦੀਪ ਸਿੰਘ, ਅਸ਼ੋਕ ਮਾਲਵਾ, ਸੁਰਿੰਦਰ, ਦਿਨੇਸ਼ ਬੱਲੂਆਣਾ, ਵਿਸ਼ਣੂ,ਵੀਨਾ ਰਾਣੀ ਆਦਿ ਹਾਜ਼ਰ ਸਨ |
