ਪਟਿਆਲਾ, 17 ਅਕਤੂਬਰ (ਅਮਰਬੀਰ ਸਿੰਘ ਆਹਲੂਵਾਲੀਆਂ)-ਲੰਘੇ ਦਿਨੀਂ ਕਈ ਵਿਭਾਗਾਂ ਦੀ ਕਾਰਵਾਈ ਵਿਚ ਸਨੌਰੀ ਅੱਡਾ ਇਲਾਕੇ 'ਚ ਢਾਹੇੇ ਗਏ 14 ਘਰਾਂ 'ਚੋਂ ਸੱਤ ਘਰ ਗਲਤ ਢਾਹੇ ਗਏ ਹਨ | ਇਹ ਗੱਲ ਸਾਬਕਾ ਵਿਦੇਸ਼ ਰਾਜ ਮੰਤਰੀ ਤੇ ਭਾਜਪਾਈ ਆਗੂ ਪਰਨੀਤ ਕੌਰ ਵਲੋਂ ਇਕ ਪ੍ਰੈੱਸ ਮਿਲਣੀ ਦੌਰਾਨ ਕਹੀ ਗਈ | ਉਨ੍ਹਾਂ ਮੁਤਾਬਿਕ ਇਸ ਮਾਮਲੇ ਵਿਚ ਭਾਜਪਾਈ ਆਗੂ ਮਹਿਲਾ ਮੋਰਚਾ ਭਾਜਪਾ ਦੀ ਸੂਬਾਈ ਪ੍ਰਧਾਨ ਜੈਇੰਦਰ ਕੌਰ ਵਲੋਂ ਪੈਰਵੀ ਕਰਦਿਆਂ ਮਾਨਯੋਗ ਅਦਾਲਤ ਤੋਂ ਸਟੇਅ ਆਰਡਰ ਲਿਆਂਦੇ ਹਨ | ਪੁੱਛੇ ਜਾਣ 'ਤੇ ਉਨ੍ਹਾਂ ਇਹ ਵੀ ਮੰਨਿਆ ਕਿ ਨਸ਼ੇ ਦੇ ਕਾਰੋਬਾਰ ਕਰਨ ਵਾਲਿਆਂ ਦੇ ਘਰ ਢਾਹੇ ਜਾਣ ਜਿਸ ਦਾ ਕਿਸੇ ਨੂੰ ਕੋਈ ਇਤਰਾਜ਼ ਨਹੀਂ ਸਗੋਂ ਇਹ ਸ਼ਲਾਘਾ ਭਰਪੂਰ ਕਦਮ ਹੈ ਪਰੰਤੂ ਇਸ ਦੀ ਆੜ ਵਿਚ ਆਮ ਲੋਕਾਂ ਦੇ ਘਰ ਵੀ ਢਾਹ ਦਿੱਤੇ ਜਾਣੇ ਸਰਾਸਰ ਗਲਤ ਹੈ | ਉਨ੍ਹਾਂ ਇਸ ਕਾਰਵਾਈ ਨੂੰ ਇਨ੍ਹਾਂ ਘਰਾਂ ਦੇ ਪਿੱਛੇ ਪਈ ਕਾਫੀ ਜ਼ਮੀਨ ਦੇ ਮਾਲਕ ਵਲੋਂ ਕਰਵਾਈ ਗਈ ਕਾਰਵਾਈ ਦੱਸਿਆ | ਪਰਨੀਤ ਕੌਰ ਦੇ ਕਹਿਣ ਮੁਤਾਬਿਕ ਇਹ ਘਰ ਤਾਂ ਢਾਏ ਗਏ ਹਨ ਕਿਉਂਕਿ ਇਨ੍ਹਾਂ ਘਰਾਂ ਦੇ ਪਿੱਛੇ ਕਿਸੇ ਬਿਲਡਰ ਜਾਂ ਰਾਜਨੀਤਿਕ ਵਿਅਕਤੀ ਦੀ ਜ਼ਮੀਨ ਹੈ | ਜਿਸ ਕਾਰਨ ਇਨ੍ਹਾਂ ਘਰਾਂ ਨੂੰ ਤੋੜ ਕੇ ਰਸਤਾ ਦਿੱਤਾ ਜਾਣਾ ਹੈ | ਉਨ੍ਹਾਂ ਮੰਗ ਕੀਤੀ ਕਿ ਜੇ ਸਰਕਾਰੀ ਜਗ੍ਹਾ ਤੋਂ ਇਨ੍ਹਾਂ ਨੂੰ ਉਠਾਉਣਾ ਹੀ ਹੈ ਤਾਂ ਇਨ੍ਹਾਂ ਲਈ ਰਹਿਣ ਦਾ ਬਦਲਵਾਂ ਪ੍ਰਬੰਧ ਕੀਤਾ ਜਾਣਾ ਚਾਹੀਦਾ ਸੀ | ਇਕ ਸਵਾਲ ਦੇ ਜਵਾਬ ਵਿਚ ਉਨ੍ਹਾਂ ਕਿਹਾ ਕਿ ਸੂਬਾ ਸਰਕਾਰ ਵਲੋਂ ਸਰਕਾਰੀ ਥਾਵਾਂ ਵੱਡੇ ਪੱਧਰ 'ਤੇ ਵੇਚ ਕੇ ਸਰਕਾਰ ਚਲਾਉਣੀ ਕਿਸੇ ਪਾਸਿਉਂ ਵੀ ਜਾਇਜ਼ ਨਹੀਂ ਕਿਹਾ ਜਾ ਸਕਦਾ | ਉਨ੍ਹਾਂ ਕਿਹਾ ਕਿ ਸੂਬੇ ਦੇ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਵੈਸੇ ਤਾਂ ਹਰ ਵੇਲੇ ਖਜਾਨੇ ਭਰੇ ਹੋਣ ਦਾ ਰਾਗ ਅਲਾਪਦੇ ਹਨ ਪਰੰਤੂ ਜਿਸ ਵਕਤ ਲੋਕਾਂ ਦੀ ਮਦਦ ਦੀ ਗੱਲ ਹੁੰਦੀ ਹੈ ਤਾਂ ਉਹ ਕੇਂਦਰ ਸਰਕਾਰ 'ਤੇ ਛਿੱਠਾ ਕਸੀਕਰਨ ਲੱਗਿਆ ਸਮਾਂ ਨਹੀਂ ਲਾਉਂਦੇ | ਲੰਘੇ ਦਿਨੀਂ ਪੰਜਾਬ ਪੁਲਿਸ ਵਲੋਂ ਫੜੇ ਗਏ ਭਾਜਪਾ ਆਗੂ ਨਵਨੀਤ ਚਤੁਰਵੇਦੀ ਬਾਰੇ ਉਨ੍ਹਾਂ ਕੁਝ ਵੀ ਕਹਿਣ ਤੋਂ ਮਾਮਲਾ ਅਦਾਲਤ ਵਿਚ ਹੋਣ ਦੀ ਗੱਲ ਕਹਿ ਕੇ ਸੰਕੋਚ ਹੀ ਕੀਤਾ | ਇਸ ਮੌਕੇ ਉਨ੍ਹਾਂ ਦੇ ਨਾਲ ਵਿਜੇ ਕੁਮਾਰ ਕੂਕਾ ਅਤੇ ਹੋਰ ਆਗੂ ਹਾਜ਼ਰ ਸਨ |
