ਰੱਖੜੀ ਦੇ ਤਿਉਹਾਰ ਨੂੰ ਲੈ ਕੇ ਬਾਜ਼ਾਰਾਂ ’ਚ ਰੌਣਕਾਂ ਵਧੀਆਂ

ਢਿਲਵਾਂ, 24 ਅਗਸਤ (ਗੋਬਿੰਦ ਸੁਖੀਜਾ)-ਜਿਵੇਂ-ਜਿਵੇਂ ਰੱਖੜੀ ਦਾ ਤਿਉਹਾਰ ਨੇੜੇ ਆ ਰਿਹਾ ਹੈ, ਬਾਜ਼ਾਰਾਂ ‘ਚ ਰੌਣਕਾਂ ਵਧ ਰਹੀਆਂ ਹਨ | ਭਰਾ-ਭੈਣ ਦੇ ਪਵਿੱਤਰ ਰਿਸ਼ਤੇ ਦੇ ਇਸ ਤਿਉਹਾਰ ਨੂੰ ਲੈ ਕੇ ਬਾਜ਼ਾਰਾਂ ‘ਚ ਕਾਫ਼ੀ ਉਤਸ਼ਾਹ ਹੈ, ਢਿਲਵਾਂ ਦੇ ਬਾਜ਼ਾਰਾਂ ‘ਚ ਰੰਗ-ਬਿਰੰਗੀਆਂ ਰੱਖੜੀਆਂ ਦੇ ਸਟਾਲ ਸਜਣੇ ਸ਼ੁਰੂ ਹੋ ਗਏ ਹਨ | ਭੈਣਾਂ ਆਪਣੇ ਭਰਾਵਾਂ ਲਈ ਵਿਸ਼ੇਸ਼ ਰੱਖੜੀਆਂ ਚੁਣਨ ‘ਚ ਰੁੱਝੀਆਂ ਹੋਈਆਂ ਹਨ | ਇਸ ਵਾਰ ਰਵਾਇਤੀ ਰੱਖੜੀਆਂ ਦੇ ਨਾਲ-ਨਾਲ ਬੱਚਿਆਂ ਲਈ ਥੀਮ ਆਧਾਰਿਤ, ਅਨੁਕੂਲਿਤ ਅਤੇ ਕਾਰਟੂਨ ਰੱਖੜੀਆਂ ਦੀ ਵੀ ਬਹੁਤ ਮੰਗ ਹੈ | ਰੱਖੜੀ ਦੇ ਨਾਲ-ਨਾਲ ਕੱਪੜਾ ਬਾਜ਼ਾਰ ਵੀ ਗਾਹਕਾਂ ਨਾਲ ਭਰਿਆ ਹੋਇਆ ਹੈ | ਇਸ ਦੇ ਨਾਲ ਹੀ ਮਠਿਆਈਆਂ, ਤੋਹਫ਼ੇ ਦੀਆਂ ਚੀਜ਼ਾਂ ਅਤੇ ਸਜਾਵਟੀ ਚੀਜ਼ਾਂ ਦੀਆਂ ਦੁਕਾਨਾਂ ‘ਤੇ ਵੀ ਚੰਗੀ ਭੀੜ ਦੇਖਣ ਨੂੰ ਮਿਲ ਰਹੀ ਹੈ | ਗਾਹਕ ਵੀ ਖ਼ਰੀਦਦਾਰੀ ਦਾ ਆਨੰਦ ਮਾਣ ਰਹੇ ਹਨ | ਬਾਜ਼ਾਰਾਂ ‘ਚ ਹਰ ਰੋਜ਼ ਖ਼ਰੀਦਦਾਰਾਂ ਦੀ ਗਿਣਤੀ ਵੱਧ ਰਹੀ ਹੈ, ਜਿਸ ਕਾਰਨ ਵਪਾਰੀਆਂ ‘ਚ ਉਤਸ਼ਾਹ ਹੈ |