ਆਈ . ਆਈ . ਟੀ . ਨੇ 59 ਫ਼ੌਜੀ ਅਧਿਕਾਰੀਆਂ ਨੂੰ ਡਿਫੈਂਸ ਟੈਕਨਾਲੋਜੀ ਡਿਗਰੀਆਂ ਦਿੱਤੀਆਂ
ਰੂਪਨਗਰ, 9 ਅਕਤੂਬਰ (ਗੁਰਪ੍ਰੀਤ ਸਿੰਘ ਹੁੰਦਲ)-ਫ਼ੌਜੀ ਵਰਤੋਂ ਲਈ ਬਣੀ ਪਹਿਲੀ ਆਈ. ਆਈ.
ਪ
ਪੋਸਟ ਗ੍ਰੈਜੂਏਟ ਡਿਗਰੀ ਦਾ ਪਹਿਲਾ ਬੈਚ ਯਾਦਗਾਰੀ ਤਸਵੀਰ ’ਚ।
10-10-2026
ਰੂਪਨਗਰ, 9 ਅਕਤੂਬਰ (ਗੁਰਪ੍ਰੀਤ ਸਿੰਘ ਹੁੰਦਲ)-ਫ਼ੌਜੀ ਵਰਤੋਂ ਲਈ ਬਣੀ ਪਹਿਲੀ ਆਈ.ਆਈ.ਟੀ. ਪੋਸਟ ਗ੍ਰੈਜੂਏਟ ਡਿਗਰੀ ਦਾ ਪਹਿਲਾ ਬੈਚ ਪੂਰਾ ਹੋਇਆ। ਭਾਰਤੀ ਤਕਨਾਲੋਜੀ ਸੰਸਥਾਨ ਰੋਪੜ ਨੇ ਆਰਮਰਡ ਕੋਰ ਸੈਂਟਰ ਐਂਡ ਸਕੂਲ (ਏ.ਸੀ.ਸੀ. ਐਂਡ ਐੱਸ) ਦੇ ਅਧਿਕਾਰੀਆਂ ਨੂੰ ਮਾਸਟਰ ਆਫ਼ ਟੈਕਨਾਲੋਜੀ (ਡਿਫੈਂਸ ਟੈਕਨਾਲੋਜੀ) ਦੀਆਂ 59 ਡਿਗਰੀਆਂ ਪ੍ਰਦਾਨ ਕੀਤੀਆਂ ਹਨ। ਇਹ ਇਸ ਪ੍ਰੋਗਰਾਮ ਦਾ ਪਹਿਲਾ ਬੈਚ ਸੀ। ਡਿਗਰੀਆਂ ਏਸੀਸੀ ਐਂਡ ਐੱਸ, ਅਹਿਲਿਆਨਗਰ ਵਿਚ ਆਈ.ਆਈ.ਟੀ. ਰੋਪੜ ਦੇ ਡਾਇਰੈਕਟਰ ਪ੍ਰੋ. ਰਾਜੀਵ ਅਹੂਜਾ ਨੇ ਪ੍ਰਦਾਨ ਕੀਤੀਆਂ। ਇਸ ਮੌਕੇ ਏਸੀਸੀ ਐਂਡ ਐੱਸ ਦੇ ਕਮਾਡੈਂਟ ਮੇਜਰ ਜਨਰਲ ਵਿਕਰਮ ਵਰਮਾ, ਐੱਸ ਐਮ, ਵੀਐੱਸਐਮ, ਅਤੇ ਆਈ.ਆਈ.ਟੀ. ਰੋਪੜ ਦੇ ਡੀਨ (ਪੀਜੀ ਅਤੇ ਖੋਜ) ਡਾ. ਸਾਰੰਗ ਗੁਮਫੇਕਰ ਵੀ ਮੌਜੂਦ ਸਨ। ਉਨ੍ਹਾਂ ਕਿਹਾ ਕਿ ਇਹ ਪ੍ਰੋਗਰਾਮ ਆਪਣੀ ਕਿਸਮ ਦਾ ਪਹਿਲਾ ਹੈ। ਪਹਿਲੀ ਵਾਰ ਕਿਸੇ ਆਈ.ਆਈ.ਟੀ. ਨੇ ਖ਼ਾਸ ਤੌਰ ’ਤੇ ਫ਼ੌਜੀ ਵਰਤੋਂ ਲਈ ਉੱਨਤ ਪੋਸਟ ਗ੍ਰੈਜੂਏਟ ਡਿਗਰੀ ਤਿਆਰ ਕੀਤੀ ਹੈ। ਇਸ ਮੌਕੇ ਪ੍ਰੋ. ਰਾਜੀਵ ਅਹੂਜਾ ਨੇ ਕਿਹਾ, ‘‘ਅੱਜ ਕਲਾਸ-ਰੂਮ ਦਾ ਗਿਆਨ ਜੰਗ ਦੇ ਮੈਦਾਨ ਨਾਲ ਮਿਲ ਰਿਹਾ ਹੈ। ਇਹ ਅਧਿਕਾਰੀ ਭਾਰਤ ਨੂੰ ਆਪਣੀਆਂ ਰੱਖਿਆ ਤਕਨੀਕਾਂ ਆਪ ਬਣਾਉਣ ਵਿਚ ਮਦਦ ਕਰਨਗੇ।’’ ਉਨ੍ਹਾਂ ਕਿਹਾ ਕਿ ਆਈ.ਆਈ.ਟੀ. ਰੋਪੜ ਅਤੇ ਏਸੀਸੀ ਐਂਡ ਐੱਸ ਨੇ ਮਿਲ ਕੇ ਐਮ.ਟੈਕ (ਡਿਫੈਂਸ ਟੈਕਨਾਲੋਜੀ) ਪ੍ਰੋਗਰਾਮ ਤਿਆਰ ਕੀਤਾ ਹੈ। ਇਹ ਅਕਾਦਮਿਕ ਸਿਖਲਾਈ ਨੂੰ ਭਾਰਤੀ ਫ਼ੌਜ ਦੀਆਂ ਲੋੜਾਂ ਮੁਤਾਬਿਕ ਢਾਲਦਾ ਹੈ। ਪਾਠਕ੍ਰਮ ਵਿਚ ਵਿਹਾਰਕ ਸਿੱਖਿਆ, ਹੱਥੀਂ ਖੋਜ ਅਤੇ ਸਮੱਸਿਆ ਹੱਲ ਕਰਨ ’ਤੇ ਜ਼ੋਰ ਦਿੱਤਾ ਗਿਆ ਹੈ। ਪ੍ਰੋਗਰਾਮ ਪੂਰਾ ਕਰਨ ਵਾਲੇ ਅਧਿਕਾਰੀਆਂ ਨੂੰ ਆਈ.ਆਈ.ਟੀ. ਰੋਪੜ ਤੋਂ ਐਮ.ਟੈੱਕ ਦੀ ਡਿਗਰੀ ਮਿਲਦੀ ਹੈ ਤੇ ਉਮੀਦ ਕੀਤੀ ਜਾਂਦੀ ਹੈ ਕਿ ਉਹ ਆਰਮਡ ਫਾਰਮੇਸ਼ਨਾਂ ਵਿਚ ਤਕਨੀਕੀ ਆਧੁਨਿਕੀਕਰਨ ਦੀ ਅਗਵਾਈ ਕਰਨਗੇ। ਉਹ ਰੱਖਿਆ ਨਿਰਮਾਣ ਵਿਚ ਸਵਦੇਸ਼ੀ ਕਰਨ ਨੂੰ ਵੀ ਹੁਲਾਰਾ ਦੇਣਗੇ। ਇਸ ਸਮਝੌਤੇ ਤਹਿਤ ਸਾਂਝੀ ਖੋਜ ਅਤੇ ਵਿਕਾਸ ਲਈ ਇੱਕ ਢਾਂਚਾ ਵੀ ਬਣਾਇਆ ਗਿਆ ਹੈ। ਇਸ ਵਿਚ ਬਖਤਰਬੰਦ ਵਾਹਨ ਤਕਨਾਲੋਜੀ, ਉੱਨਤ ਹਥਿਆਰ ਪ੍ਰਣਾਲੀਆਂ ਅਤੇ ਨਵੀਆਂ ਸਮੱਗਰੀਆਂ ਸ਼ਾਮਲ ਹਨ। ਇਹ ਪਹਿਲ ਰੱਖਿਆ ਖੇਤਰ ਵਿਚ ਭਾਰਤ ਦੀ ਆਤਮਨਿਰਭਰਤਾ ਅਤੇ ਵਿਕਸਿਤ ਭਾਰਤ 2047 ਦੇ ਟੀਚਿਆਂ ਨੂੰ ਅੱਗੇ ਵਧਾਉਂਦੀ ਹੈ। ਦੱਸਣਯੋਗ ਹੈ ਕਿ ਅਹਿਲਿਆਨਗਰ, ਮਹਾਰਾਸ਼ਟਰ ਵਿਚ ਸਥਿਤ ਆਰਮਰਡ ਕੋਰ ਸੈਂਟਰ ਐਂਡ ਸਕੂਲ (ਏਸੀਸੀ ਐਂਡ ਐੱਸ) ਭਾਰਤੀ ਫ਼ੌਜ ਦੀ ਆਰਮਰਡ ਕੋਰ ਦੀ ਪ੍ਰਮੁੱਖ ਸਿਖਲਾਈ ਸੰਸਥਾ ਹੈ। ਇੱਥੇ ਅਧਿਕਾਰੀਆਂ ਅਤੇ ਸੈਨਿਕਾਂ ਨੂੰ ਬਖਤਰਬੰਦ ਯੁੱਧ, ਟੈਂਕ ਰਣਨੀਤੀ ਅਤੇ ਆਧੁਨਿਕ ਬਖਤਰਬੰਦ ਪਲੇਟਫ਼ਾਰਮਾਂ ਦੀ ਵਰਤੋਂ ਦੀ ਸਿਖਲਾਈ ਦਿੱਤੀ ਜਾਂਦੀ ਹੈ। ਇਹ ਭਾਰਤ ਦੀਆਂ ਬਖਤਰਬੰਦ ਟੁਕੜੀਆਂ ਦੀ ਤਕਨੀਕੀ ਅਤੇ ਰਣਨੀਤਕ ਤਾਕਤ ਵਧਾਉਣ ਵਿਚ ਅਹਿਮ ਭੂਮਿਕਾ ਨਿਭਾਉਂਦਾ ਹੈ।
