ਕਰ ਮੁਕਤ ਵਪਾਰ ਸਮਝੌਤੇ ਤੇ ਲੈਂਡ ਪੂਲਿੰਗ ਨੀਤੀ ਖ਼ਿਲਾਫ਼ ਕਿਸਾਨਾਂ ਵਲੋਂ ਰੋਸ ਪ੍ਰਦਰਸ਼ਨ

ਰੂਪਨਗਰ, 5 ਅਗਸਤ (ਸਤਨਾਮ ਸਿੰਘ ਸੱਤੀ)- ਸੰਯੁਕਤ ਕਿਸਾਨ ਮੋਰਚਾ (ਗੈਰ-ਸਿਆਸੀ) ਭਾਰਤ ਦੇ ਸੱਦੇ ’ਤੇ ਸ਼ੇਰ-ਏ-ਪੰਜਾਬ ਕਿਸਾਨ ਯੂਨੀਅਨ ਵਲੋਂ ਜ਼ਿਲ੍ਹਾ ਸ਼ਹਿਰੀ ਪ੍ਰਧਾਨ ਦਲਜੀਤ ਸਿੰਘ ਗਿੱਲ ਦੀ ਅਗਵਾਈ ਹੇਠ ਡੀ. ਸੀ. ਦਫ਼ਤਰ ਰੂਪਨਗਰ ਅੱਗੇ ਰੋਸ ਪ੍ਰਦਰਸ਼ਨ ਕਰਕੇ ਡਿਪਟੀ ਕਮਿਸ਼ਨਰ ਦਫ਼ਤਰ ਦੇ ਅਧਿਕਾਰੀ ਨੂੰ ਮੰਗ ਪੱਤਰ ਸੌਂਪਿਆ ਗਿਆ। ਕਿਸਾਨ ਆਗੂਆਂ ਨੇ ਕਰ ਮੁਕਤ ਵਪਾਰ ਸਮਝੌਤਾ, ਨਵੀਂ ਲੈਂਡ ਪੂਲਿੰਗ ਨੀਤੀ, ਬਿਜਲੀ ਐਕਟ-2025, ਸਮਾਰਟ ਮੀਟਰ, ਬੀਜ ਐਕਟ-2025 ਅਤੇ ਬਿਜਲੀ ਦੇ ਨਿਗਮੀਕਰਨ ਦਾ ਵਿਰੋਧ ਕਰਦਿਆਂ ਇਨ੍ਹਾਂ ਨੂੰ ਰੱਦ ਕਰਨ ਦੀ ਮੰਗ ਕੀਤੀ। ਇਸ ਦੇ ਨਾਲ ਹੀ ਡੇਅਰੀ ਫਾਰਮਰਾਂ ਤੋਂ ਵਪਾਰਕ ਦਰਾਂ ’ਤੇ ਬਿਜਲੀ ਬਿੱਲ ਵਸੂਲਣਾ ਬੰਦ ਕਰਨ, ਖੇਤੀਬਾੜੀ ਨੂੰ ਪ੍ਰਦੂਸ਼ਣ ਐਕਟ ਤੋਂ ਬਾਹਰ ਰੱਖਣ, 2007 ਦੀ ਨੀਤੀ ਅਧੀਨ ਰੱਦ ਕੀਤੇ 19,200 ਕਿਸਾਨ ਪਰਿਵਾਰਾਂ ਦੇ ਇੰਤਕਾਲ ਬਹਾਲ ਕਰਨ ਅਤੇ ਕਿਸਾਨਾਂ ਦੀ ਕਰਜ਼ ਮੁਕਤੀ ਦੀ ਵੀ ਮੰਗ ਕੀਤੀ ਗਈ। ਇਸ ਮੌਕੇ ਰਣਜੀਤ ਸਿੰਘ ਭਾਗੋਮਾਜਰਾ, ਮਾਸਟਰ ਬਲਿੰਦਰ ਸਿੰਘ ਦੁਮਛੇੜੀ, ਸੋਹਣ ਸਿੰਘ ਮਗਰੋੜ, ਜਗਮੀਤ ਸਿੰਘ ਮੁਗਲ ਮਾਜਰੀ, ਬਲਵਿੰਦਰ ਸਿੰਘ ਸੈਫਲਪੁਰ, ਮੁਖਤਿਆਰ ਸਿੰਘ ਫੂਲ, ਮੇਹਰ ਸਿੰਘ ਮੀਆਂਪੁਰ, ਦਿਦਾਰ ਸਿੰਘ, ਮੋਹਣ ਸਿੰਘ ਠੋਣਕੀ, ਜਗਤਾਰ ਸਿੰਘ ਹਰੀਪੁਰ, ਜਗਦੀਪ ਸਿੰਘ ਚੂਹੜ ਮਾਜਰਾ, ਮਨਿੰਦਰ ਸਿੰਘ ਗੱਗੋ, ਗੁਰਪ੍ਰੀਤ ਸਿੰਘ ਚੂਹੜ ਮਾਜਰਾ, ਸੁਖਵੰਤ ਸਿੰਘ ਚੁਪਕੀ, ਗੁਰਦੀਪ ਸਿੰਘ ਪੰਜੋਲਾ, ਸੁਖਵਿੰਦਰ ਸਿੰਘ ਗੱਗੋ, ਅਜੈਬ ਸਿੰਘ ਸਰਾੜੀ ਅਤੇ ਕੁਲਵੰਤ ਸਿੰਘ ਸਰਾੜੀ ਸਮੇਤ ਵੱਡੀ ਗਿਣਤੀ ਵਿਚ ਕਿਸਾਨ ਹਾਜ਼ਰ ਸਨ।