ਜਰਨੈਲੀ ਸੜਕਾਂ ’ਤੇ ਲੱਗ ਰਹੇ ਕੂੜੇ ਦੇ ਢੇਰਾਂ ਤੋਂ ਜ਼ਿਲ੍ਹਾ ਪ੍ਰਸ਼ਾਸਨ ਬੇਖ਼ਬਰ

ਆਲਮਗੀਰ, 6 ਅਕਤੂਬਰ (ਜਰਨੈਲ ਸਿੰਘ ਪੱਟੀ)-ਸਮਾਰਟ ਸਿਟੀ ਅਖ਼ਵਾਉਣ ਵਾਲਾ ਮਹਾਂਨਗਰ ਲੁਧਿਆਣਾ, ਜਿਸਦਾ ਤੇਜ਼ੀ ਨਾਲ ਦਾਇਰਾ ਵੱਧਦਾ ਜਾ ਰਿਹਾ ਹੈ, ਪਰ ਅਫ਼ਸੋਸ ਦੀ ਗੱਲ ਹੈ ਕਿ ਪੰਜਾਬ ਦਾ ਸਭ ਤੋਂ ਵੱਡਾ ਸ਼ਹਿਰ ਹੋਣ ਦੇ ਬਾਵਜੂਦ ਇਸ ਦੀਆਂ ਸੜਕਾਂ ’ਤੇ ਲੱਗ ਰਹੇ ਕੂੜੇ ਦੇ ਢੇਰ ਸੂਬੇ ਦੀ ਸਭ ਤੋਂ ਵੱਡੀ ਨਗਰ ਨਿਗਮ ਲੁਧਿਆਣਾ ਦੀ ਕੂੜਾ ਪ੍ਰਬੰਧਨ ਨੀਤੀ ਨੂੰ ‘ਫੇਲੀਅਰ’ ਸਾਬਤ ਕਰ ਰਹੇ ਹਨ। ਗਿੱਲ ਨਹਿਰ ਤੋਂ ਦੋਰਾਹਾ ਵੱਲ ਦੱਖਣੀ ਬਾਈਪਾਸ ਅਤੇ ਮਲੇਰਕੋਟਲਾ ਰੋਡ, ਗਿੱਲ ਗਾਰਡਨ ਚੌਕ, ਗਿੱਲ ਵਿਖੇ ਸਮਾਜ ਵਿਰੋਧੀ ਅਨਸਰਾਂ ਵਲੋਂ ਸੜਕ ‘ਤੇ ਹੀ ਕੂੜੇ ਦੇ ਢੇਰ ਲਗਾ ਕੇ ਗੰਦਗੀ ਫੈਲਾਈ ਜਾ ਰਹੀ ਹੈ, ਜੋ ਕਿ ਸੜਕ ’ਤੇ ਚੱਲ ਰਹੇ ਵਾਹਨਾਂ ਦੀ ਰਫ਼ਤਾਰ ਨਾਲ ਖਿੱਲਰ ਕੇ ਦੂਰ-ਦੂਰ ਤੱਕ ਜਾਣ ਕਰਕੇ ਇਲਾਕੇ ਨੂੰ ਗੰਦਗੀ ਭਰੇ ਮਾਹੌਲ ਵਿਚ ਤਬਦੀਲ ਕਰ ਰਹੇ ਹਨ।