ਬਲਾਚੌਰ, 29 ਜਨਵਰੀ (ਨਰੇਸ਼ ਧੌਲ)-ਇਲਾਕੇ ਦੀ ਨਾਮਵਰ ਸ਼ਖ਼ਸੀਅਤ ਪੰਜਾਬ ਦੇ ਉੱਘੇ ਲੇਖਕ ਅਤੇ ਅਦਾਕਾਰ ਸੋਹਣ ਆਦੋਆਣਾ ਨੇ ਗੱਲਬਾਤ ਕਰਦਿਆਂ ਆਖਿਆ ਕਿ ਪੰਜਾਬੀ ਮਾਂ ਬੋਲੀ ਦੀਆਂ ਅੱਠ ਉੱਪਨਿਸ਼ਦਾਂ ਜਾਂ ਉੱਪ ਬੋਲੀਆਂ ਹਨ ਜਿਨ੍ਹਾਂ 'ਚੋਂ ਸੱਤ ਬੋਲੀਆਂ ਗੂਗਲ 'ਤੇ ਦਿਖਾਈ ਦਿੰਦੀਆਂ ਹਨ | ਪ੍ਰੰਤੂ ਗੋਜਰੀ ਭਾਸ਼ਾ ਦਾ ਕਿਤੇ ਵੀ ਨਾਂਅ ਨਿਸ਼ਾਨ ਨਹੀਂ ਦਿਖਾਈ ਦਿੰਦਾ | ਉਨ੍ਹਾਂ ਦੱਸਿਆ ਕਿ ਗੋਜਰੀ ਜੋ ਪੰਜਾਬ ਦੇ ਕੰਢੀ, ਦੂਣ, ਖੇੜਾ ਅਤੇ ਬੀਤ ਖੇਤਰਾਂ 'ਚ ਬੋਲੀ ਜਾਂਦੀ ਹੈ, ਪਰ ਵੱਡੇ ਅਫਸੋਸ ਦੀ ਗੱਲ ਹੈ ਕਿ ਗੋਜਰੀ ਗੂਗਲ 'ਤੇ ਸਰਚ ਕਰਨ ਦੌਰਾਨ ਕਿਧਰੇ ਵੀ ਨਜ਼ਰ ਨਹੀਂ ਆਉਂਦੀ ਅਤੇ ਨਾ ਹੀ ਇਹ ਕਿਧਰੇ ਰਜਿਸਟਰਡ ਹੈ | ਉਨ੍ਹਾਂ ਕਿਹਾ ਕਿ ਉੱਪ ਬੋਲੀਆਂ ਲਿਖਣ 'ਚ ਨਹੀਂ ਆਉਂਦੀਆਂ ਸਿਰਫ ਬੋਲਣ 'ਚ ਹੀ ਆਉਂਦੀਆ ਹਨ | ਅਸੀਂ ਆਪਣੇ ਪਰਿਵਾਰ ਅਤੇ ਬੱਚਿਆਂ ਨਾਲ ਬੋਲਣ ਤੋਂ ਗੁਰੇਜ਼ ਕਰਨ ਲੱਗ ਪਏ ਹਾਂ ਖਾਸ ਕਰਕੇ ਗੋਜਰੀ ਦੇ ਅਲੋਪ ਹੋਣ ਦਾ ਬਹੁਤ ਖ਼ਤਰਾ ਹੈ | ਕਿਉਂਕਿ ਬਾਕੀ 7 ਉੱਪ ਬੋਲੀਆਂ ਗੂਗਲ 'ਤੇ ਨਜ਼ਰ ਆਉਂਦੀਆ ਹਨ ਅਤੇ ਰਜਿਸਟਰਡ ਹਨ ਸੋ ਮੈਂ ਪੰਜਾਬ ਸਰਕਾਰ ਅਤੇ ਭਾਸ਼ਾ ਵਿਭਾਗ ਤੋਂ ਗੋਜਰੀ ਲਈ ਇਨਸਾਫ ਦੀ ਮੰਗ ਕਰਦਾ ਹਾਂ | ਆਦੋਆਣਾ ਨੇ ਆਖਿਆ ਕਿ ਸਾਡੇ ਲੇਖਕਾਂ ਨੂੰ ਵੀ ਗੋਜਰੀ ਬੋਲੀ ਲਈ ਅੱਗੇ ਆਉਣਾ ਚਾਹੀਦਾ ਹੈ ਤਾਂ ਜੋ ਇਸ ਭਾਸ਼ਾ ਨੂੰ ਵੀ ਬਣਦਾ ਮਾਣ ਸਤਿਕਾਰ ਪ੍ਰਾਪਤ ਹੋ ਸਕੇ |
