ਮੋਦੀ ਸਰਕਾਰ ਦੇ ਮੰਤਰੀਆਂ ਦਾ ਦੋ ਦਿਨਾ ਚਿੰਤਨ ਕੈਂਪ ਸ਼ੁਰੂ ਪ੍ਰਧਾਨ ਮੰਤਰੀ ਵੀ ਹੋਏ ਸ਼ਾਮਿਲ

ਨਵੀਂ ਦਿੱਲੀ, 23 ਸਤੰਬਰ (ਉਪਮਾ ਡਾਗਾ ਪਾਰਥ)- ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਬੁੱਧਵਾਰ ਨੂੰ ਕੇਂਦਰੀ ਮੰਤਰੀ ਮੰਡਲ ਦੇ ਦੋ ਦਿਨਾਂ ਚਿੰਤਨ ਕੈਂਪ ਦੀ ਰਸਮੀ ਸ਼ੁਰੂਆਤ ਕੀਤੀ। ਇਸ ਚਿੰਤਨ ਕੈਂਪ ਵਿਚ ਵਿਕਸਿਤ ਭਾਰਤ 2047 ਦੇ ਅਗਲੇ ਪੜਾਅ ਲਈ ਤਰਜੀਹਾਂ ਅਤੇ ਸੁਧਾਰ ਤੈਅ ਕਰਨ ’ਤੇ ਵਿਚਾਰ ਚਰਚਾ ਕੀਤੀ ਜਾਵੇਗੀ। ਸੇਵਾ ਤੀਰਥ ’ਚ ਹੋ ਰਹੀ ਇਸ ਬੈਠਕ ’ਚ ਪਹਿਲੇ ਦਿਨ ਹਰ ਮੰਤਰੀ ਦੇ ਕੰਮ ਦੀ ਪੇਸ਼ਕਾਰੀ ਦਿੱਤੀ ਗਈ ਜਦਕਿ ਦੂਜੇ ਦਿਨ ਕੰਮਕਾਜ ਦੀ ਸਮੀਖਿਆ ਕੀਤੀ ਜਾਵੇਗੀ। ਮੰਤਰੀ ਮੰਡਲ ਨੂੰ ਕਈ ਸਮੂਹਾਂ ’ਚ ਵੰਡਿਆ ਗਿਆ ਹੈ ਜਿਸ ’ਚ ਮੰਤਰੀਆਂ ਦੀ ਨਿੱਜੀ ਕਾਰਜ ਸਮਰੱਥਾ, ਪ੍ਰਭਾਵੀ ਸੰਚਾਰ, ਮੰਤਰਾਲੇ ਦਾ ਕੰਮਕਾਜ ਅਤੇ ਹਿਤਧਾਰਕਾਂ ਨਾਲ ਜੁੜਾਅ ਸ਼ਾਮਿਲ ਹੈ। ਹਲਕਿਆਂ ਮੁਤਾਬਿਕ ਦੂਜੇ ਦਿਨ ਹੋਣ ਵਾਲੀ ਸਮੀਖਿਆ ’ਚ ਮੰਤਰੀਆਂ ਨੂੰ ਗ੍ਰੇਡਿੰਗ ਦਿੱਤੀ ਜਾਵੇਗੀ। 4 ਗ੍ਰੇਡਾਂ ’ਚ ਦਿੱਤੀ ਜਾਣ ਵਾਲੀ ਗ੍ਰੇਡਿੰਗ ’ਚ ਐਕਸੀਲੈਂਟ ਅਤੇ ਗੁਡ ਦੀ ਕੈਟੇਗਰੀ ’ਚ ਆਉਣ ਵਾਲੇ ਮੰਤਰੀ ਗ੍ਰੀਨ ਜ਼ੋਨ ’ਚ, ਜਦਕਿ ਐਵਰੇਜ਼ ਅਤੇ ਪੂਅਰ ਕੈਟੇਗਰੀ ’ਚ ਆਉਣ ਵਾਲੇ ਮੰਤਰੀਆਂ ਨੂੰ ਮੰਤਰੀ ਮੰਡਲ ਤੋਂ ਬਾਹਰ ਦਾ ਰਾਹ ਵਿਖਾਇਆ ਜਾ ਸਕਦਾ ਹੈ। ਹਲਕਿਆਂ ਮੁਤਾਬਿਕ ਸਾਰੇ ਕੈਬਨਿਟ ਮੰਤਰੀਆਂ ਤੋਂ ਸੰਖੇਪ ਸੁਝਾਅ ਜਾਂ ਵਿਚਾਰ ਵੀ ਲਏ ਜਾਣਗੇ। ਇਹ ਅਮਲ ਮੋਦੀ ਦੇ ਰਾਜ ਮੰਤਰੀਆਂ ਦੇ ਨਾਲ ਕੀਤੀ ਅਤੇ ਕੰਮਕਾਜ ’ਤੇ ਹੋਈ ਹਾਲੀਆ ਗੱਲਬਾਤ ਅਤੇ ਕੇਂਦਰੀ ਮੰਤਰੀਆਂ ਨਾਲ ਵੱਖਰੇ ਤੌਰ ’ਤੇ ਹੋਈ ਸਮੀਖਿਆ ਤੋਂ ਬਾਅਦ ਹੋ ਰਿਹਾ ਹੈ। ਉਸ ਸਮੀਖਿਆ ’ਚ ਉਨ੍ਹਾਂ ਦੇ ਕੰਮਕਾਜ ਅਤੇ ਸੋਸ਼ਲ ਮੀਡੀਆ ’ਤੇ ਉਨ੍ਹਾਂ ਦੀ ਮੌਜੂਦਗੀ ਜਿਹੇ ਵਿਸ਼ੇ ਸਾਂਝੇ ਕੀਤੇ ਗਏ ਸਨ। ਇਸ ਸ਼ਿਵਰ ’ਚ ਮੰਤਰਾਲਿਆਂ ਅਤੇ ਵਿਭਾਗਾਂ, ਸਕੱਤਰਾਂ ਦੇ ਸਮੂਹਾਂ, ਕੈਬਨਿਟ ਸਕੱਤਰੇਤ ਅਤੇ ਨੀਤੀ ਆਯੋਗ ਤੋਂ ਮਿਲੇ ਇਨਪੁਟ ਦਾ ਇਸਤੇਮਾਲ ਕੀਤਾ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਵਿਕਸਿਤ ਭਾਰਤ ਦੇ ਵਿਜ਼ਨ ’ਤੇ 2021 ਤੋਂ ਕੰਮ ਹੋ ਰਿਹਾ ਹੈ। 2021 ’ਚ ਮੋਦੀ ਵਲੋਂ ਪੂਰੇ ਮੰਤਰੀ ਮੰਡਲ ਦੇ ਕੁੱਲ 5 ਚਿੰਤਨ ਸ਼ਿਵਰ ਕੀਤੇ ਗਏ ਸਨ।