ਚੰਡੀਗੜ੍ਹ, 21 ਅਕਤੂਬਰ (ਸੰਦੀਪ ਕੁਮਾਰ ਮਾਹਨਾ)ਪੰਜਾਬ ਤੇ ਹਰਿਆਣਾ ਹਾਈ ਕੋਰਟ ਨੇ ਨਿਆਂਇਕ ਢਾਂਚੇ 'ਚ ਫ਼ੇਰਬਦਲ ਕੀਤਾ ਹੈ | ਪੰਜਾਬ ਜੁਡੀਸ਼ੀਅਲ ਸਰਵਿਸ ਦੇ 13 ਨਿਆਂਇਕ ਅਧਿਕਾਰੀਆਂ ਦੇ ਤਬਾਦਲੇ ਅਤੇ ਨਿਯੁਕਤੀਆਂ ਦੇ ਹੁਕਮ ਜਾਰੀ ਕੀਤੇ ਗਏ ਹਨ | ਇਸ 'ਚ ਨੌਂ ਵਧੀਕ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਸ਼ਾਮਿਲ ਹਨ | ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਦੇ ਅਹੁਦੇ 'ਤੇ ਤਰੱਕੀ ਪ੍ਰਾਪਤ ਕਰਨ ਵਾਲੇ ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜਾਂ ਵਿਚ ਜਤਿੰਦਰ ਕੌਰ ਨੂੰ ਅੰਮਿ੍ਤਸਰ 'ਚ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵਜੋਂ ਨਿਯੁਕਤ ਕੀਤਾ ਗਿਆ ਹੈ, ਜਦੋਂਕਿ ਬਲ ਬਹਾਦਰ ਸਿੰਘ ਤੇਜੀ ਨੂੰ ਚੰਡੀਗੜ੍ਹ 'ਚ ਕਾਨੂੰਨੀ ਯਾਦਗਾਰੀ ਅਤੇ ਪ੍ਰਮੁੱਖ ਸਕੱਤਰ (ਕਾਨੂੰਨ), ਪੰਜਾਬ ਸਰਕਾਰ ਵਜੋਂ ਤਬਦੀਲ ਕੀਤਾ ਗਿਆ ਹੈ | ਅਵਤਾਰ ਸਿੰਘ ਨੂੰ ਪਟਿਆਲਾ, ਨੀਲਮ ਅਰੋੜਾ ਨੂੰ ਮੋਗਾ, ਅੰਸ਼ੁਲ ਬੇਰੀ ਨੂੰ ਬਰਨਾਲਾ, ਮਨਜੋਤ ਕੌਰ ਨੂੰ ਰੂਪਨਗਰ ਤੇ ਧਰਮਿੰਦਰ ਪਾਲ ਸਿੰਗਲਾ ਨੂੰ ਫਾਜ਼ਿਲਕਾ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵਜੋਂ ਤਰੱਕੀ ਦਿੱਤੀ ਗਈ ਹੈ | ਰਜਨੀਸ਼ ਗਰਗ ਨੂੰ ਡੈਪੂਟੇਸ਼ਨ 'ਤੇ ਸਟੇਟ ਟਰਾਂਸਪੋਰਟ ਅਤੇ ਫੂਡ ਸੇਫਟੀ ਅਪੀਲੇਟ ਟਿ੍ਬਿਊਨਲ, ਪੰਜਾਬ (ਚੰਡੀਗੜ੍ਹ) ਦਾ ਪ੍ਰੀਜ਼ਾਈਡਿੰਗ ਅਫ਼ਸਰ ਨਿਯੁਕਤ ਕੀਤਾ ਗਿਆ ਹੈ, ਜਦਕਿ ਸੰਜੀਵ ਜੋਸ਼ੀ ਨੂੰ ਫ਼ਰੀਦਕੋਟ 'ਚ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਵਜੋਂ ਤਾਇਨਾਤ ਕੀਤਾ ਗਿਆ ਹੈ | ਹੋਰ ਵਧੀਕ ਜ਼ਿਲ੍ਹਾ ਅਤੇ ਸੈਸ਼ਨ ਜੱਜ ਜਿਨ੍ਹਾਂ ਦਾ ਤਬਾਦਲਾ ਕੀਤਾ ਗਿਆ ਹੈ, ਉਨ੍ਹਾਂ 'ਚ ਦਿਨੇਸ਼ ਕੁਮਾਰ ਵਧਵਾ ਨੂੰ ਐਸ.ਏ.ਐਸ. ਨਗਰ 'ਚ ਨਵੀਂ ਸੀ.ਬੀ.ਆਈ. ਅਦਾਲਤ ਵਜੋਂ ਅਤੇ ਅਰੁਣ ਕੁਮਾਰ ਅਗਰਵਾਲ ਨੂੰ ਸਟੇਟ ਲੀਗਲ ਸਰਵਿਸਿਜ਼ ਅਥਾਰਟੀ, ਯੂਟੀ ਚੰਡੀਗੜ੍ਹ ਦੇ ਮੈਂਬਰ ਸਕੱਤਰ ਵਜੋਂ ਸ਼ਾਮਿਲ ਕੀਤਾ ਗਿਆ ਹੈ |
