ਕਿਸੇ ਰਾਜ ਦੇ ਹੱਕੀ ਹਿੱਸੇ ਦੇ ਫ਼ੰਡਾਂ ਚ ਕੋਈ ਕਟੌਤੀ ਨਹੀਂ ਕੀਤੀ ਜਾਂਦੀ - ਸੀਤਾਰਮਨ

ਨਵੀਂ ਦਿੱਲੀ, 21 ਸਤੰਬਰ - ਕੇਂਦਰ ਤੋਂ ਮਿਲਣ ਵਾਲੇ ਫ਼ੰਡਾਂ ਦੇ ਮਾਮਲੇ ਵਿਚ ਪੰਜਾਬ ਨਾਲ ਵਿਤਕਰਾ ਕੀਤੇ ਜਾਣ ਦੇ 'ਆਪ' ਸਰਕਾਰ ਦੇ ਦੋਸ਼ਾਂ 'ਤੇ ਕੇਂਦਰੀ ਵਿੱਤ ਮੰਤਰੀ ਨਿਰਮਲਾ ਸੀਤਾਰਮਨ ਨੇ ਕਿਹਾ, "ਕਿਸੇ ਵੀ ਰਾਜ ਨਾਲ ਅਜਿਹਾ ਵਿਹਾਰ ਨਹੀਂ ਕੀਤਾ ਜਾਂਦਾ ਜਿਸ ਨਾਲ ਉਸ ਨੂੰ ਨੁਕਸਾਨ ਹੋਵੇ ਜਾਂ ਉਸ ਨੂੰ ਬੇਲੋੜੀ ਮੁਸ਼ਕਲ ਦਾ ਸਾਹਮਣਾ ਕਰਨਾ ਪਵੇ। ਮੈਂ ਕਿਸੇ ਦੀਆਂ ਅੱਖਾਂ ਵਿਚ ਅੱਖਾਂ ਪਾ ਕੇ ਪੂਰੇ ਭਰੋਸੇ ਨਾਲ ਇਹ ਗੱਲ ਕਿਤੇ ਵੀ ਕਹਿ ਸਕਦੀ ਹਾਂ। ਕਿਸੇ ਰਾਜ ਦੇ ਹੱਕੀ ਹਿੱਸੇ ਦੇ ਫ਼ੰਡਾਂ ਵਿਚ ਕੋਈ ਕਟੌਤੀ ਨਹੀਂ ਕੀਤੀ ਜਾਂਦੀ; ਅਸੀਂ ਸਮੇਂ ਸਿਰ ਭੁਗਤਾਨ ਜਾਰੀ ਕਰਦੇ ਹਾਂ। ਇਸ ਲਈ, ਅਜਿਹੇ ਬੇਬੁਨਿਆਦ ਦੋਸ਼ ਲਗਾਉਣਾ ਗਲਤ ਹੈ। ਸ਼ਾਇਦ ਪੰਜਾਬ ਵਿਚ ਚੋਣਾਂ ਨੇੜੇ ਹੋਣ ਕਾਰਨ, ਉਹ ਆਪਣੀ ਕਾਰਗੁਜ਼ਾਰੀ ਦੀਆਂ ਕਮੀਆਂ ਨੂੰ ਲੁਕਾਉਣ ਲਈ ਅਜਿਹੇ ਬਿਆਨ ਦੇ ਰਹੇ ਹਨ।"