ਭੁਵਨੇਸ਼ਵਰ, 23 ਅਗਸਤ - ਉੜੀਸਾ ਦੇ ਤੱਟ 'ਤੇ ਬੰਗਾਲ ਦੀ ਖਾੜੀ 'ਚ ਇਕ ਮਾਲਵਾਹਕ ਜਹਾਜ਼ ਡੁੱਬ ਗਿਆ। ਜਹਾਜ਼ ਵਿਚ ਕੁੱਲ 24 ਲੋਕ ਸਵਾਰ ਸਨ। ਹਾਦਸੇ ਦੇ ਕੁਝ ਘੰਟਿਆਂ ਬਾਅਦ ਦੋ ਲੋਕਾਂ ਨੂੰ ਬਚਾ ਲਿਆ ਗਿਆ, ਪਰ ਬਾਕੀ 22 ਲੋਕ ਅਜੇ ਵੀ ਲਾਪਤਾ ਹਨ। ਜਹਾਜ਼ ਸ਼ਨੀਵਾਰ ਨੂੰ ਡੁੱਬ ਗਿਆ। ਐਤਵਾਰ ਨੂੰ 24 ਘੰਟੇ ਤੋਂ ਵੱਧ ਸਮਾਂ ਬੀਤ ਜਾਣ ਦੇ ਬਾਵਜੂਦ ਵੀ ਬਾਕੀ ਲੋਕਾਂ ਦਾ ਕੋਈ ਪਤਾ ਨਹੀਂ ਲੱਗਾ। ਭਾਰਤੀ ਤੱਟ ਰੱਖਿਅਕ ਅਤੇ ਜਲ ਸੈਨਾ ਸਮੁੰਦਰ ਅਤੇ ਅਸਮਾਨ ਤੋਂ ਉਨ੍ਹਾਂ ਦੀ ਭਾਲ ਕਰ ਰਹੀ ਹੈ।
ਡੁੱਬੇ ਜਹਾਜ਼ ਦਾ ਨਾਮ ਐਮ.ਵੀ ਓਸ਼ੀਅਨ ਵਿਨਰ ਹੈ। ਇਹ ਪਨਾਮਾ ਦੇ ਝੰਡੇ ਵਾਲਾ ਜਹਾਜ਼ ਸੀ। ਇਹ 20 ਅਗਸਤ ਨੂੰ ਉੜੀਸਾ ਦੇ ਪਾਰਾਦੀਪ ਬੰਦਰਗਾਹ ਤੋਂ ਚੀਨ ਲਈ ਰਵਾਨਾ ਹੋਇਆ ਸੀ। ਜਹਾਜ਼ ਵਿਚ ਕਰੀਬ 72 ਹਜ਼ਾਰ ਟਨ ਲੋਹਾ ਲੱਦਿਆ ਹੋਇਆ ਸੀ। ਇਸਦੀ ਕੁੱਲ ਮਾਲ ਢੋਣ ਦੀ ਸਮਰੱਥਾ ਲਗਭਗ 73 ਹਜ਼ਾਰ ਟਨ ਸੀ।
