ਵਿਰੋਧੀ ਧਿਰ ਦੇ ਦੋ ਉਮੀਦਵਾਰ ਚੁੱਕੇ ਜਾਣ ਕਾਰਨ ਕੋਆਪਰੇਟਿਵ ਸੁਸਾਇਟੀ ਦੀ ਚੋਣ ਬਣੀ ਤਣਾਅ-ਪੂਰਨ

ਤਲਵੰਡੀ ਸਾਬੋ, (ਬਠਿੰਡਾ), 19 ਅਗਸਤ (ਰਣਜੀਤ ਸਿੰਘ ਰਾਜੂ)- ਇਤਿਹਾਸਕ ਨਗਰ ਤਲਵੰਡੀ ਸਾਬੋ ਦੀ ਕੋਆਪਰੇਟਿਵ ਸੁਸਾਇਟੀ ਦੀ ਅੱਜ ਹੋ ਰਹੀ ਚੋਣ ਦੌਰਾਨ ਮਾਹੌਲ ਉਸ ਸਮੇਂ ਤਣਾਅ ਪੂਰਨ ਬਣ ਗਿਆ, ਜਦੋਂ ਚੋਣ ਪ੍ਰਕਿਰਿਆ ਸ਼ੁਰੂ ਹੋਣ ਤੋਂ ਐਨ ਪਹਿਲਾਂ ਪਤਾ ਲੱਗਾ ਕਿ ਸੱਤਾ ਧਿਰ ਦੇ ਖਿਲਾਫ਼ ਚੋਣ ਲੜਨ ਵਾਲੇ ਦੋ ਉਮੀਦਵਾਰਾਂ ਨੂੰ ਪੁਲਿਸ ਨੇ ਲੰਘੀ ਰਾਤ ਹੀ ਇਕ ਦਰਖ਼ਾਸਤ ਦੇ ਆਧਾਰ ’ਤੇ ਹਿਰਾਸਤ ’ਚ ਲੈ ਲਿਆ ਹੈ। ਇਸ ਤੋਂ ਬਾਅਦ ਅਕਾਲੀ ਅਤੇ ਕਾਂਗਰਸ ਨਾਲ ਸੰਬੰਧਿਤ ਆਗੂਆਂ ਨੇ ਵਿਰੋਧ ਪ੍ਰਗਟਾਇਆ।ਅਕਾਲੀ ਦਲ (ਬ) ਦੇ ਹਲਕਾ ਇੰਚਾਰਜ ਰਵੀਪ੍ਰੀਤ ਸਿੰਘ ਸਿੱਧੂ ਅਤੇ ਕਾਂਗਰਸੀ ਆਗੂ ਹਰਬੰਸ ਸਿੰਘ ਨੇ ਦੱਸਿਆ ਕਿ ਲੰਘੀ ਸ਼ਾਮ ਜਿਉਂ ਹੀ ਸੱਤਾ ਧਿਰ ਨੂੰ ਪਤਾ ਲੱਗਾ ਕਿ ਸੁਸਾਇਟੀ ਚੋਣ ਲਈ ਹਾਈਕੋਰਟ ਤੋਂ ਆਬਜ਼ਰਵਰ  ਨਿਯੁਕਤ ਕਰਵਾ ਲਿਆ ਗਿਆ ਹੈ ਤਾਂ ਸੱਤਾ ਧਿਰ ਨੇ ਹਾਰ ਦੇ ਡਰੋਂ ਬੁਖਲਾ ਕੇ ਨਗਰ ਵਲੋਂ ਸਾਂਝੇ ਤੌਰ ’ਤੇ ਚੋਣ ਲੜ ਰਹੇ ਦੋ ਉਮੀਦਵਾਰਾਂ ਸਮੁੰਦਾ ਸਿੰਘ ਗਿੱਲ ਅਤੇ ਕੈਲਾ ਸਿੰਘ ਸਰਾਂ ਨੂੰ ਪੁਲਿਸ ਤੋਂ ਚੁਕਵਾ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਅਗਰ ਨਾਮਜ਼ਦਗੀ ਪਰਚੇ ਦਾਖ਼ਲ ਕਰਨ ਲਈ ਦੋਵੇਂ ਉਮੀਦਵਾਰ ਨਾ ਛੱਡੇ ਗਏ ਤਾਂ ਸੰਘਰਸ਼ ਵਿੱਢਿਆ ਜਾਵੇਗਾ।ਦੂਜੇ ਪਾਸੇ ਤਣਾਅ ਨੂੰ ਦੇਖਦਿਆਂ ਸੁਸਾਇਟੀ ਦੇ ਬਾਹਰ ਪੁਲਿਸ ਬਲਾਂ ਦੀ ਤਾਇਨਾਤੀ ਕਰ ਦਿੱਤੀ ਗਈ ਹੈ।