ਲਵਲੀਨਾ ਨੇ ਸੋਨ ਤਗਮਾ ਜਿੱਤ ਕੇ ਮਨਾਇਆ ਜਨਮ ਦਿਨ

ਭਾਰਤ ਨੇ 6 ਸੋਨ, 2 ਚਾਂਦੀ ਤੇ 2 ਕਾਂਸੀ ਸਮੇਤ 10 ਤਗਮੇ ਜਿੱਤੇ

ਖ਼ਿਤਾਬ ਬਰਕਰਾਰ ਰੱਖਣ ਵਾਲੀ ਦੂਜੀ ਭਾਰਤੀ ਮਹਿਲਾ ਮੁੱਕੇਬਾਜ਼

ਆਈਚੀ-ਨਾਗੋਆ, 2 ਅਕਤੂਬਰ (ਯੂ. ਐਨ. ਆਈ.)-ਲਵਲੀਨਾ ਬੋਰਗੋਹੇਨ ਨੇ ਏਸ਼ਿਆਈ ਖੇਡਾਂ ਵਿਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਚੀਨ ਦੀ ਬਾਓ ਜ਼ਿਯੀ ਨੂੰ ਹਰਾ ਕੇ ਔਰਤਾਂ ਦੇ 75 ਕਿੱਲੋਗ੍ਰਾਮ ਵਰਗ ਵਿਚ ਸੋਨ ਤਗਮਾ ਜਿੱਤ ਕੇ ਆਪਣਾ 29ਵਾਂ ਜਨਮ ਦਿਨ ਮਨਾਇਆ।ਇਸ ਜਿੱਤ ਦੇ ਨਾਲ ਹੀ ਮਹਿਲਾ ਮੁੱਕੇਬਾਜ਼ੀ ’ਚ ਭਾਰਤ ਦਾ ਸੋਨ ਤਗਮਾ ਜਿੱਤਣ ਦਾ 12 ਸਾਲ ਦਾ ਇੰਤਜ਼ਾਰ ਵੀ ਖ਼ਤਮ ਹੋ ਗਿਆ। ਭਾਰਤ ਦੀਆਂ ਸਭ ਤੋਂ ਸਫ਼ਲ ਮੁੱਕੇਬਾਜ਼ਾਂ ’ਚ ਸ਼ਾਮਿਲ ਉਲੰਪਿਕ ਤਗਮਾ ਜੇਤੂ ਲਵਲੀਨਾ ਨੇ ਚੀਨੀ ਮੁੱਕੇਬਾਜ਼ ਨੂੰ 5-0 ਦੇ ਸਰਬਸੰਮਤ ਫੈਸਲੇ ਨਾਲ ਹਰਾਇਆ। ਇਸ ਜਿੱਤ ਦੇ ਨਾਲ ਹੀ ਉਸ ਨੇ ਪਿਛਲੀਆਂ ਏਸ਼ਿਆਈ ਖੇਡਾਂ ’ਚ ਜਿੱਤੇ ਚਾਂਦੀ ਦੇ ਤਗਮੇ ਦਾ ਰੰਗ ਵੀ ਬਦਲ ਦਿੱਤਾ। ਇਸ ਦੇ ਨਾਲ ਹੀ ਉਹ ਮੈਰੀਕੋਮ (ਜਿਸ ਨੇ 2014 ਵਿਚ ਇੰਚੀਓਨ ਵਿਖੇ ਮਹਿਲਾ ਫਲਾਈਵੇਟ ਮੁਕਾਬਲਾ ਜਿੱਤਿਆ ਸੀ) ਤੋਂ ਬਾਅਦ ਏਸ਼ਿਆਈ ਖੇਡਾਂ ਵਿਚ ਸੋਨ ਤਗਮਾ ਜਿੱਤਣ ਵਾਲੀ ਦੂਜੀ ਭਾਰਤੀ ਮਹਿਲਾ ਮੁੱਕੇਬਾਜ਼ ਬਣ ਗਈ ਹੈ। ਹਾਂਗਜ਼ੂ (2022) ਵਿਚ ਲਵਲੀਨਾ ਨੇ ਇਸੇ ਮੁਕਾਬਲੇ ਵਿਚ ਚਾਂਦੀ ਦਾ ਤਗਮਾ ਜਿੱਤਿਆ ਸੀ।ਲਵਲੀਨਾ ਨੇ ਸਖ਼ਤ ਮੁਕਾਬਲੇ ’ਚ ਅਜੇਤੂ ਚੀਨੀ ਮੁੱਕੇਬਾਜ਼ ਖ਼ਿਲਾਫ਼ ਆਪਣਾ ਸੰਜਮ ਬਣਾਈ ਰੱਖਿਆ ਅਤੇ ਅੰਤ ਵਿਚ ਆਪਣੀ ਮੁਹਿੰਮ ਨੂੰ ਸੋਨ ਤਗਮੇ ਵਿਚ ਬਦਲ ਦਿੱਤਾ। ਲਵਲੀਨਾ ਨੇ ਚੰਗੀ ਸ਼ੁਰੂਆਤ ਕੀਤੀ ਅਤੇ ਜੱਜਾਂ ਦੇ ਸਕੋਰ ਕਾਰਡ ‘ਤੇ ਪਹਿਲਾ ਰਾਊਂਡ 3-2 ਨਾਲ ਆਪਣੇ ਨਾਂਅ ਕੀਤਾ। ਬਾਓ ਨੇ ਦੂਜੇ ਰਾਊਂਡ ਵਿਚ ਜ਼ਬਰਦਸਤ ਵਾਪਸੀ ਕੀਤੀ, ਦੂਰੀ ਘਟਾਈ ਅਤੇ ‘ਅੱਪਰਕੱਟਾਂ’ ਨਾਲ ਹਮਲਾ ਕੀਤਾ ਪਰ ਲਵਲੀਨਾ ਨੇ ਰਾਊਂਡ ਦੇ ਅੰਤ ਵਿਚ ਸੰਭਲਦਿਆਂ ਆਪਣੀ ਬੜ੍ਹਤ ਬਣਾਈ ਰੱਖੀ।