ਸਿੰਘਪੁਰਾ ਬੱਸ ਸਟੈਂਡ ’ਤੇ ਔਰਤ ਦੇ ਗਲੇ ’ਚੋਂ 2 ਤੋਲੇ ਦਾ ਮੰਗਲਸੂਤਰ ਚੋਰੀ ਹੋਣ ਦੇ ਦੋਸ਼ ਹੇਠ ਮਾਮਲਾ ਦਰਜ
ਜ਼ੀਰਕਪੁਰ, 2 ਅਕਤੂਬਰ (ਮਨਿੰਦਰ ਸਿੰਘ)-ਜ਼ੀਰਕਪੁਰ ਦੇ ਸਿੰਘਪੁਰਾ ਬੱਸ ਸਟੈਂਡ ‘ਤੇ ਬੱਸ ਵਿਚ ਚੜ੍ਹਦੇ ਸਮੇਂ ਪੰਚਕੂਲਾ ਸਿੱਖਿਆ ਵਿਭਾਗ ਵਿਚ ਤਾਇਨਾਤ ਇਕ ਔਰਤ ਦੇ ਗਲੇ ‘ਚੋਂ ਕਰੀਬ 2 ਤੋਲੇ ਦਾ ਸੋਨੇ ਦਾ ਮੰਗਲਸੂਤਰ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਔਰਤ ਨੇ ਦੋਸ਼ ਲਗਾਇਆ ਕਿ 4-5 ਅਣਪਛਾਤੀਆਂ ਔਰਤਾਂ ਨੇ ਭੀੜ ਦਾ ਫਾਇਦਾ ਉਠਾ ਕੇ ਉਸ ਦੇ ਗਲੇ ‘ਚੋਂ ਮੰਗਲਸੂਤਰ ਖਿੱਚ ਲਿਆ।
ਜ਼ੀਰਕਪੁਰ, 2 ਅਕਤੂਬਰ (ਮਨਿੰਦਰ ਸਿੰਘ)-ਜ਼ੀਰਕਪੁਰ ਦੇ ਸਿੰਘਪੁਰਾ ਬੱਸ ਸਟੈਂਡ ‘ਤੇ ਬੱਸ ਵਿਚ ਚੜ੍ਹਦੇ ਸਮੇਂ ਪੰਚਕੂਲਾ ਸਿੱਖਿਆ ਵਿਭਾਗ ਵਿਚ ਤਾਇਨਾਤ ਇਕ ਔਰਤ ਦੇ ਗਲੇ ‘ਚੋਂ ਕਰੀਬ 2 ਤੋਲੇ ਦਾ ਸੋਨੇ ਦਾ ਮੰਗਲਸੂਤਰ ਚੋਰੀ ਹੋਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਔਰਤ ਨੇ ਦੋਸ਼ ਲਗਾਇਆ ਕਿ 4-5 ਅਣਪਛਾਤੀਆਂ ਔਰਤਾਂ ਨੇ ਭੀੜ ਦਾ ਫਾਇਦਾ ਉਠਾ ਕੇ ਉਸ ਦੇ ਗਲੇ ‘ਚੋਂ ਮੰਗਲਸੂਤਰ ਖਿੱਚ ਲਿਆ। ਵਾਰਦਾਤ ਤੋਂ ਬਾਅਦ ਸ਼ੱਕੀ ਔਰਤਾਂ ਚਿੱਟੀ ਵੈਨ ਅਤੇ ਚਿੱਟੀ ਸਵਿਫ਼ਟ ਕਾਰ ਵਿਚ ਸਵਾਰ ਹੋ ਕੇ ਫ਼ਰਾਰ ਹੋ ਗਈਆਂ। ਪੁਲਿਸ ਨੇ ਅਣਪਛਾਤੀਆਂ ਔਰਤਾਂ ਵਿਰੁੱਧ ਮਾਮਲਾ ਦਰਜ ਕਰ ਕੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ। ਪੁਲਿਸ ਨੂੰ ਦਿੱਤੇ ਬਿਆਨ ਵਿਚ ਪੂਜਾ (32) ਵਾਸੀ ਪੰਚਕੂਲਾ ਨੇ ਦੱਸਿਆ ਕਿ ਉਹ ਪੰਚਕੂਲਾ ਸਿੱਖਿਆ ਵਿਭਾਗ ਵਿਚ ਲੀਗਲ ਅਸਿਸਟੈਂਟ ਦੇ ਅਹੁਦੇ ‘ਤੇ ਤਾਇਨਾਤ ਹੈ। 7 ਸਤੰਬਰ ਨੂੰ ਉਹ ਗੁਰੂਗ੍ਰਾਮ ਸਥਿਤ ਆਪਣੇ ਘਰ ਤੋਂ ਬੱਸ ਰਾਹੀਂ ਸਿੰਘਪੁਰਾ ਬੱਸ ਸਟੈਂਡ ਪਹੁੰਚੀ ਸੀ। ਇਥੇ ਪੰਚਕੂਲਾ ਜਾਣ ਵਾਲੀ ਬੱਸ ਦੀ ਉਡੀਕ ਕਰਦਿਆਂ ਉਹ ਕਰੀਬ 10-15 ਮਿੰਟ ਖੜ੍ਹੀ ਰਹੀ। ਉਸ ਅਨੁਸਾਰ ਜਿਵੇਂ ਹੀ ਪੰਚਕੂਲਾ ਜਾਣ ਵਾਲੀ ਬੱਸ ਆਈ ਅਤੇ ਉਹ ਬੱਸ ਵਿਚ ਚੜ੍ਹਨ ਲੱਗੀ, ਤਾਂ 4-5 ਅਣਪਛਾਤੀਆਂ ਔਰਤਾਂ ਵੀ ਉਸ ਦੇ ਨਾਲ ਚੜ੍ਹਨ ਲੱਗੀਆਂ। ਇਨ੍ਹਾਂ ਵਿਚੋਂ ਦੋ ਔਰਤਾਂ ਅੱਗੇ ਸਨ ਅਤੇ ਇਕ ਔਰਤ ਡਿੱਗ ਵੀ ਗਈ ਸੀ। ਇਸ ਦੌਰਾਨ ਹੋਈ ਧੱਕਾ-ਮੁੱਕੀ ਵਿਚ ਕਿਸੇ ਨੇ ਉਸ ਦੇ ਗਲੇ ‘ਚੋਂ ਮੰਗਲਸੂਤਰ ਖਿੱਚ ਲਿਆ। ਬੱਸ ਵਿਚ ਚੜ੍ਹਨ ਤੋਂ ਬਾਅਦ ਗਲੇ ‘ਤੇ ਹੱਥ ਲਾਉਣ ‘ਤੇ ਉਸ ਨੂੰ ਮੰਗਲਸੂਤਰ ਗਾਇਬ ਹੋਣ ਦਾ ਪਤਾ ਲੱਗਾ। ਪੁਲਿਸ ਨੇ ਸ਼ਿਕਾਇਤ ਦੇ ਆਧਾਰ ‘ਤੇ ਅਣਪਛਾਤੀ ਔਰਤਾਂ ਖਿਲਾਫ਼ ਬੀ. ਐੱਨ. ਐੱਸ. ਦੀ ਧਾਰਾ 304 ਅਤੇ 3 (5) ਤਹਿਤ ਮਾਮਲਾ ਦਰਜ ਕਰ ਕੇ ਸ਼ੱਕੀ ਔਰਤਾਂ ਦੀ ਪਛਾਣ ਲਈ ਆਸ-ਪਾਸ ਲੱਗੇ ਸੀ. ਸੀ. ਟੀ. ਵੀ. ਕੈਮਰਿਆਂ ਦੀ ਫੁਟੇਜ ਖੰਗਾਲਣੀ ਸ਼ੁਰੂ ਕਰ ਦਿੱਤੀ ਹੈ।
