ਖਸਤਾ ਹਾਲਤ ਸੜਕ ਤੋਂ ਦੁਖੀ ਹੋ ਕੇ ਪਿੰਡ ਵਾਸੀਆਂ ਨੇ ਖ਼ੁਦ ਮੁਰੰਮਤ ਕੀਤੀ ਸ਼ੁਰੂ

ਅ

ਅਜੀਤ ਡੈਸਕ 17-09-2026

ਪਠਾਨਕੋਟ, 16 ਸਤੰਬਰ (ਵਿਨੋਦ)- ਸੜਕ ਦੋ ਸਾਲਾਂ ਤੋਂ ਮਾੜੀ ਹਾਲਤ ਵਿਚ ਸੀ ਅਤੇ ਸ਼ਿਕਾਇਤਾਂ ਦੇ ਬਾਵਜੂਦ ਕੋਈ ਹੱਲ ਨਹੀਂ ਨਿਕਲਿਆ, ਪਿੰਡ ਵਾਸੀਆਂ ਨੇ ਇਕ ਮਿਸਾਲ ਕਾਇਮ ਕੀਤੀ । ਬੁੰਗਲ ਗ੍ਰਾਮ ਪੰਚਾਇਤ ਦੇ ਵਾਰਡ ਨੰਬਰ-3 ਵਿਚ ਸਥਿਤ ਬਾਈ ਮੁਹੱਲਾ ਦੇ ਪਿੰਡ ਵਾਸੀਆਂ ਨੇ ਖਸਤਾ ਹਾਲਤ ਵਾਲੀ ਸੰਪਰਕ ਸੜਕ ਦੀ ਮੁਰੰਮਤ ਕਰਨ ਦੀ ਜ਼ਿੰਮੇਵਾਰੀ ਆਪਣੇ ਸਿਰ ਲਈ । 150 ਘਰਾਂ ਦੀ ਆਬਾਦੀ ਨੂੰ ਪਠਾਨਕੋਟ-ਡਲਹੌਜ਼ੀ ਰਾਸ਼ਟਰੀ ਰਾਜ ਮਾਰਗ ਨਾਲ ਜੋੜਨ ਵਾਲੀ ਲਗਪਗ 200 ਫੁੱਟ ਸੜਕ ਕਾਫ਼ੀ ਸਮੇਂ ਤੋਂ ਮਾੜੀ ਹਾਲਤ ਵਿਚ ਸੀ । ਪਿੰਡ ਵਾਸੀਆਂ ਲਈ ਇਸ ‘ਤੇ ਤੁਰਨਾ ਵੀ ਮੁਸ਼ਕਿਲ ਹੋ ਗਿਆ ਸੀ, ਗੱਡੀ ਚਲਾਉਣਾ ਤਾਂ ਦੂਰ ਦੀ ਗੱਲ । ਪਿੰਡ ਵਾਸੀਆਂ ਨੇ ਇਸ ਸਮੱਸਿਆ ਬਾਰੇ ਸਬੰਧਿਤ ਵਿਭਾਗ ਤੇ ਆਮ ਆਦਮੀ ਪਾਰਟੀ ਆਗੂਆਂ ਨੂੰ ਵਾਰ-ਵਾਰ ਅਪੀਲ ਕੀਤੀ, ਪਰ ਦੋ ਸਾਲ ਬਾਅਦ ਵੀ ਸੜਕ ਦੀ ਮੁਰੰਮਤ ਨਹੀਂ ਹੋਈ । ਅੰਤ ਵਿਚ ਪਿੰਡ ਵਾਸੀਆਂ ਨੇ ਆਪਸ ਵਿਚ ਪੈਸੇ ਇਕੱਠੇ ਕੀਤੇ ਅਤੇ ਸੜਕ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਕੀਤਾ । ਸਥਾਨਿਕ ਮਾਮਾ ਰਸੋਈ ਰੈਸਟੋਰੈਂਟ ਦੇ ਮਾਲਕ ਤੇ ਸਮਾਜ ਸੇਵਕ ਜਗਜੀਤ ਸਿੰਘ ਜੱਗਾ, ਸਮਾਜ ਸੇਵਕ ਨਰਿੰਦਰ ਸਿੰਘ ਚੀਮਾ, ਵਾਰਡ ਪੰਚ ਰਾਜੇਸ਼ ਕੁਮਾਰ ਅਤੇ ਸਾਬਕਾ ਪੰਚਾਇਤ ਮੈਂਬਰ ਨਾਰਾਇਣ ਸਿੰਘ ਨੇ ਇਸ ਯਤਨ ਵਿਚ ਮਦਦ ਕੀਤੀ । ਪਿੰਡ ਦੀ ਸਰਪੰਚ ਮੀਨਾ ਦੇਵੀ ਤੇ ਸਾਬਕਾ ਸਰਪੰਚ ਲਾਲ ਸਿੰਘ ਦੀ ਮੌਜੂਦਗੀ ਵਿਚ 200 ਫੁੱਟ ਦੀ ਟੁੱਟੀ ਹੋਈ ਸੜਕ ਦੀ ਮੁਰੰਮਤ ਦਾ ਕੰਮ ਸ਼ੁਰੂ ਹੋਇਆ । ਸਾਬਕਾ ਸਰਪੰਚ ਲਾਲ ਸਿੰਘ ਨੇ ਦੱਸਿਆ ਕਿ ਮੁਹੱਲਾ ਲਾਂਬੜਾ ਨੂੰ ਜਾਣ ਵਾਲੀ ਲਗਪਗ ਅੱਧਾ ਕਿੱਲੋਮੀਟਰ ਲੰਬੀ ਸੰਪਰਕ ਸੜਕ ਵੀ ਖਰਾਬ ਸੀ । ਪਿੰਡ ਵਾਸੀਆਂ ਨੇ ਵੱਡੇ-ਵੱਡੇ ਟੋਏ ਭਰ ਦਿੱਤੇ ਅਤੇ ਸੜਕ ਨੂੰ ਲੰਘਣਯੋਗ ਬਣਾ ਦਿੱਤਾ । ਸਥਾਨਿਕ ਲੋਕਾਂ ਨੇ ਇਸ ਪਹਿਲਕਦਮੀ ਦੀ ਆਪਸੀ ਸਹਿਯੋਗ ਅਤੇ ਜਨਤਕ ਭਾਗੀਦਾਰੀ ਦੀ ਉਦਾਹਰਣ ਵਜੋਂ ਸ਼ਲਾਘਾ ਕੀਤੀ ।

ਪਿਛਲੀ ਖ਼ਬਰ ਸੰਸਦ ਮੈਂਬਰ ਸੁਖਜਿੰਦਰ ਸਿੰਘ ਰੰਧਾਵਾ ਨੇ ਕਾਂਗਰਸੀ ਵਰਕਰਾਂ ਨਾਲ ਕੀਤੀ ਮੀਟਿੰਗ ਅਗਲੀ ਖ਼ਬਰ ‘ ਆਪ’ ਨੇ ਚੋਣਾਂ ਤੋਂ ਪਹਿਲਾਂ ਕੀਤੇ ਵਾਅਦੇ ਪੂਰੇ ਕਰਕੇ ਦਿਖਾਏ- ਸੁਭਾਸ਼ ਵਰਮਾ, ਰੋਹਿਤ ਵਰਮਾ

ਖਸਤਾ ਹਾਲਤ ਸੜਕ ਤੋਂ ਦੁਖੀ ਹੋ ਕੇ ਪਿੰਡ ਵਾਸੀਆਂ ਨੇ ਖ਼ੁਦ ਮੁਰੰਮਤ ਕੀਤੀ ਸ਼ੁਰੂ

ਸੰਬੰਧਿਤ ਖ਼ਬਰਾਂ